म्याग्दी, २० मंसिर – जिल्लाको सदरमुकाम बेनीस्थित कालीगण्डकी नदीमा र्याफ्टिङ सञ्चालनका लागि शुक्रबार गरिएको परिक्षण सफल भएको छ ।। म्याग्दी होटल तथा रेष्टुरेन्ट व्यवसायी संघको पहलमा कालीगण्डकीमा व्यवसायिक र्याफ्टीङ सञ्चालनका लागि प्राविधिक टोलीले परिक्षण गरेका हुन् । गलेश्वरस्थित रघुगंगा र कालीगण्डकीको दोभानदेखि बेनीको कालीपुल मोटरेबल पुलसम्मको साढे तीन किलोमिटर दुरीमा र्याफ्टिङको परिक्षण गरिएको संघका अध्यक्ष बाबुराम आचार्यले बताए ।
रेजीङ रिभर रनर प्रालीका होमबहादुर पुन र सन्तोष गिरीको टोलीले परिक्षणका लागि र्याफ्टिङ गरेका थिए । नदीको बहाव र साइड सिनलगायत प्राविधिकरुपमा गलेश्वरदेखि बेनीसम्म र्याफ्टिङ चलाउन सकिने पुनले बताए । यसअघि बेनी देखि मालढुङ्गा सम्मको १३ किलोमिटर दुरीमा र्याफ्टिङको परिक्षण गरिएको थियो । नेपाल भ्रमण वर्ष २०२० को अवसरमा बेनी भ्रमणमा आउने पर्यटकको आकर्षणका लागि र्याफ्टिङको परिक्षण गरिएको संघका सचिव सरोज थापाले बताए । 
बेनीमा पर्यटक भित्र्याउन र उनीहरुको बसाई लम्बाउन सहायक पर्यटकीय गन्तव्यको पहिचान गरिएको छ । लभ्लिहिल, केभहिल, टोड्के, तातोपानी कुण्ड, गलेश्वर, मल्लाजजस्ता पर्यटकीय सम्भावना युक्त ठाउँलाई सहायक गन्तव्य बनाएर बसाई लम्बाउन पहल गरिएको अध्यक्ष आचार्यले बताए । यसअघि विस २०७४ को म्याग्दी महोत्सवमा पनि रातोपहिरोदेखि बेनीसम्म र्याफ्टिङ सञ्चालन गरिएको थियो । कम्पनीसँग समन्वय गरेर नियमितरुपमा र्याफ्टिङ चलाउने तयारीमा रहेको होटल व्यवसायी संघले जनाएको छ ।
परिक्षणका लागि आएका र्याफ्टिङ व्यवसायीको टोलीले संघका पदाधीकारीले कालीपुलमा स्वागत गरेका थिए । म्याग्दी भएर दैनिक सयौं पर्यटक मुस्ताङ भ्रमणमा जाने र फर्कने गर्छन् । प्रचारप्रसार र पूर्वाधार विकासको अभावमा म्याग्दीका पर्यटकीयस्थल सुनसान छन् ।
