बागलुङ, ८ बैशाख – जिल्लाको काँठखोला गाउँपालिका २ र ३ वडामा सोमबार दिउँसो भीषण रुपमा परेको असिनापानीले स्थानीय उत्पादन नष्ट गरेको छ । दिउँसो २ बजेदेखि परेको असिनापानीले पाकेको अन्नबाली र तरकारी बाली पूर्णरुपमा नष्ट बनाएको काठेखोला–२ भीमापोखराका शिक्षक विक्रम शर्माले बताए ।
भीमापोखराको सिम, डोहेरी र काठेखोला–३ धम्जाका माझकटेरा, हिलेगाउँ र दुवारा लगायतका स्थानमामा ठूलो असिना परेको हो । असिनाले कृषकको खेतबारीमा पाकेको अन्नबाली गहुँ, जौ, वा र तरकारी बाली पूर्णरुपमा नष्ट भएको छ । धम्जा सामुदायिक स्वास्थ्य केन्द्रका प्रमुख लोकवहादुर भण्डारीका अनुसार, असिनाले स्थानीय बाली पूर्णरुपमा नष्ट भएकाले लाखौको क्षति भएको छ ।
कुनै ठाउँमा २ फिटभन्दा बाक्लो असिना परेको शिक्षक शर्माले वताए । ‘यता त असिना हिउँ भन्दा पनि बाक्लो छ,’ शर्माले भने । जिल्लाका अन्य स्थानमा पनि अहिले असिनापानी परिरहेको छ । यसबाट ठूलो नोक्सान हुने स्थानीयले बताएका छन् ।
तस्विर सौजन्य : विक्रम शर्मा, लोकवहादुर भण्डारी, सावित्री खड्का
