मलाई थाहा छ
कि, सबेरै भाले नबासे पनि
उज्यालो हुनेछ ।
मलाई थाहा छ
कि, निथ्रुक्क नभिजे पनि शितले
बिहान हुनेछ ।
मलाई थाहा छ
यो सर्वथा सत्य हो
कि यो सब तिमिलाई पनि थाहा छ ।
यसर्थ, हर सवेरा तिम्रो लागि बास्छ तिम्रो भाले
तिम्रो उज्यालोको लागि बास्छ ।
किनकि तिमी बिहानको उज्यालोलाई भन्दा
भालेको उज्यालोलाई प्रेम गर्छाै ।
कुनैदिन समयको कालो कराईमा
झोलझाम्टा हुनेछ तिम्रो भाले
पिइदिनेछ कसैले सित्त नबनाएर तिम्रो भालेको उज्यालो
मलाई थाहा छ ।
त्यसदिन कि तिमि सुतिरहेकै हुनेछौ
कि राती नै उठेर निस्कनेछौ घर बाहिर
कुनै अर्को भालेको खोजीमा ।