बागलु, १२ भदौ– मुस्ताङमा कोरोना भाईरसका सक्रिय संक्रमित छैनन् । साउनबाटै मुस्ताङ सक्रिय संक्रमित मुक्त बनेको हो । हिमालपारीको जिल्लालाई सक्रिय संक्रमित मुक्त बनाईराख्नको लागि जिल्ला बाहिरी जिल्लाबाट मुस्ताङ भित्रीने जोकोहीलाई १४ दिन क्वारेन्टाईन बस्नुपर्ने व्यवस्था मुस्ताङमा लागु गरिएको छ । शुक्रबार जिल्ला संकट व्यवस्थापन समितिको बैठक बसेर पास लिएर आएकालाई समेत अनिवार्य क्वारेन्टाईन बस्नुपर्ने निर्णय गरिएको मुस्ताङका सहायक प्रमुख जिल्ला अधिकारी जगदीश अर्यालले जानकारी दिए ।
‘पास नभएको व्यक्ति तथा सवारी साधनलाई मुस्ताङ जिल्ला प्रवेश गर्ने नाका घाँसाबाटै पूर्ण रूपमा रोक लगाएका छौँ,’ उनले भने, ‘यदि कोही पास बनाएर आएको छ भने यो ऊ नभनीकन अनिवार्य रूपमा १४ दिन क्वारेनटाइनमा बस्नैपर्छ, अरू विकल्प नै छैन ।’ यो निर्णयले जिल्लामा संक्रमण हुन नदिन र भइहाले पनि त्यो अवस्थालाई नियन्त्रणमा लिन सजिलो हुने उनले विश्वास दिलाए । बैठकबाट मुस्ताङका ५ वटै स्थानीय तहले तुरुन्तै प्रिआइसोलेसन र क्वारेन्टाइन निर्माण गरी एक साताभित्र व्यवस्थापन केन्द्रमा त्यसको जानकारी पठाइने निर्णय भएको छ ।
त्यस्तै मुस्ताङमा उत्पादित स्याउ तथा तरकारी बिक्री र खरिद व्यवस्थापनका लागि बगैँचा धनीको जिम्मेवारीमा वडाबाट सिफारिस गरेमा ठेकेदार वा बिक्रेतालाई क्वारेन्टाइनमा रहँदै भौतिक दूरी कायम गरेर बगैँचा हेर्न मात्र दिइने छ । तर जिल्लाभित्रका कामदारलाई मात्र टिप्न खटाउने, सङ्क्रमित व्यक्तिको मृत्यु भएमा घरपझोङ गाउँपालिकाबाहेक ४ वटा स्थानीय तहमा अनुरोध गर्ने, कामदार लैजानुपरे ठेकेदारले जिम्मा लिनेलगायत निर्णय पनि भएका छन् । घरपझोङले भने पहिले नै शव व्यवस्थापनका लागि ठाउँको निधो गरिसकेको छ । विस्तारित रूपमा राखिएको बैठकमा मुस्ताङका सांसदहरू, गाउँपालिकाका प्रमुखहरू, प्रमुख जिल्ला अधिकारी, प्रहरी प्रमुख, स्वास्थ्य कार्यालय तथा अस्पतालका प्रमुख लगायतको सहभागिता थियो ।
