बागलुङ, १० फागुन– गलकोट नगरपालिका वडा नं. ४ खरुवाका किसानले सामुहिक किवी खेती अभियान थालेका छन् ।
गलकोट नगरपालिकाको एकलाख ५० हजार आर्थिक सहयोग र बराहथान किवी उत्पादक कृषक समूहको आफ्नो लगानीबाट शनिवार ३ सय किवीका बिरुवा रोपिएको हो । किवीका लागि खाडल खन्ने, ढुवानी र रोपण गर्ने समयसम्म ७ लाख रुपैयाँ खर्च भएको समूहका अध्यक्ष उमाकान्त सुवेदीले बताए ।
किसानले १ हजार ५ सय बिरुवा रोप्ने योजना बनाएका छन् । पहिलो चरणमा १५ रोपनी जमिन व्यवस्थापन गरेर थालिएको अभियानलाई अझै बढाउने र किवीको पकेट क्षेत्र बनाउने योजना पनि उनीहरुले सुनाए ।
‘हामीले किवीबाटै किसानलाई आत्मनिर्भर बनाउने लक्ष राखेका छौं’ सुवेदीले भने, ‘यो पहिलो चरणको थालनी मात्रै हो ।’ किसानले थालेको अभियानमा वडा अध्यक्ष बलबहादुर खत्रीले साथ दिने प्रतिवद्धता जनाए ।
साथै उनले बिरुवा खोजी र बजारीकरणको अभियानमा पनि साथ दिने बताए । उक्त अबसरमा गलकोट नगरपालिकाका कृषि अधिकृत हरिदत्त सुवेदीले किसानको मेहेनतलाई प्राविधिक सहयोग गरेर सफल बनाउने बताएका छन् ।