म्याग्दी / बेनी-जोमसोम सडकअन्तर्गत रघुगंगा गाउँपालिका-२ बैंसरीमा खसेको पहिरोले चार दिनदेखि अवरुद्ध यातायात बुधबार दिउँसो साढे १ बजेबाट सञ्चालन भएको छ ।
सडकको पश्चिम भीरको डिलभन्दा माथिल्लो क्षेत्रमा चलेको पहिरोबाट निरन्तर लेदोसहित ढुंगामाटो तल सडकमा खस्ने र थुप्रो लाग्ने गरेको थियो ।
जिल्ला प्रहरी प्रमुख डिएसपी मदन कुँवरका अनुसार प्रहरी, सशस्त्र, सेना र यातायाच मजदुरहरु जुटेर एक्स्काभेटरले सडकमा थुप्रिएको पहिरो पन्छ्याएर यातायात सञ्चालन गरिएको हो ।
यातायात खुलेसँगै चार दिनदेखि सडकमा अलपत्र परेका भारतिय पर्यटकसमेत यात्रु आ(आफ्नो गन्तव्यतर्फ लागेका छन् ।
गलेश्वर-घाँसासम्मको ३८ किलोमिटर खण्डमा राति सवारी चलाउन रोक
बेनी-जोमसोम सडकको गलेश्वर-घाँसासम्मको ३८ किलोमिटर खण्डमा राति सवारी चलाउन रोक लगाएको छ ।
यो खण्डको अधिकांश क्षेत्रमा माथिबाट पहिरो खस्ने जोखिम रहेकोले यात्रुको सुरक्षाका लागि राति यातायात चलाउन रोक लगाइएको जिल्ला प्रशासन कार्यालयले सूचना प्रकाशित गरी जनाएको छ ।
