पर्वत/ मध्यपहाडी लोकमार्ग अन्तर्गत पर्वतको कुश्मा नगरपालिका–४ अर्मादीमा जिप र मोटरसाइकल आपसमा ठोक्किँदा दुई जना घाइते भएका छन् ।
जिल्ला ट्राफिक प्रहरी कार्यालय पर्वतका अनुसार बिहीबार बिहान करिब पौने नौ बजेको समयमा छमर्केको घुम्तीमा दुई सवारी ठोक्किएका हुन् । अञ्जिता कृषि तथा पशुपक्षी फार्मको कुखुरा बोक्न प्रयोग हुँदै आएको ध १ च ४० नम्बरको जिप र पर्वतकै महाशिला गाउँपालिका–३ बालाकोटका ३० वर्षीय सुरज पौडेलले चलाएको मोटरसाइकल ठोक्किएका हुन् ।
मोटरसाइकल चालक पौडेलको घुँडा र अनुहारमा चोट लागेको छ भने मोटरसाइकलको पछाडि बसेकी उनकी श्रीमती ३० बर्सिया सरिता चापागाईँको घुँडा र टाउकोमा चोट लागेको छ । उनीहरूकी छोरी चार बर्सिया समिरालाई भने चोट लागेको छैन ।
पर्वतका अस्पतालका मेडिकल सुपरिटेन्डेन्ट डा। हेमन्त बास्तोलाका अनुसार सुरजको उपचार पर्वत अस्पतालमा नै भइरहेको छ भने श्रीमती सरितालाई गम्भीर चोट लागेकाले थप उपचारको लागि पोखरा पठाइएको छ ।
