बागलुङ /  गाउँपालिका भित्रका खेलकुद, कला र साहित्यमा प्रतिभा पहिचान गर्न काठेखोला गाउँपालिकाले चैत २८ देखि अध्यक्ष कप प्रतियोगिता गर्ने भएको छ। दोस्रो काठेखोला गाउँपालिका अध्यक्ष कप प्रतियोगितामा खेलकुद, साहित्य एवं सांगितिक प्रतियोगिता हुने आयोजकले जनाएको छ ।

काठेखोला गाउँपालिका स्तरीय कला, संस्कृति तथा खेलकुद विकास समितिको संयोजन र व्यवस्थापनमा चैत्र २८ गतेदेखि बैशाख १ गतेसम्म भीमापोखराको अक्षेते बजारमा प्रतियोगिता संचालन हुनेछ ।

गाउँपालिका क्षेत्रभित्र रहेका कला, साहित्य, संगीत र खेलकुद क्षेत्रको प्रतिभाहरुको संरक्षण, सम्र्बद्धन र प्रतिभा पहिचान गर्ने उद्देश्यले अध्यक्ष कपको आयोजना गरिएको खेलकुद विकास समितिका संयोजक टिका संगम विकले जानकारी दिए ।

गाउँपालिकाभित्र रहेका खेलकुद, कला र साहित्यको प्रतिभा पहिचान हुने, पर्यटकीय क्षेत्रहरुको प्रचाप्रसार एवं प्रबद्र्धन गर्ने, खेलकुद, कला साहित्य र संगितको माध्यमबाट सभ्य संस्कृतियुक्त समुन्नत र विकसित पालिका बनाउनका लागि दोस्रो अध्यक्ष कपको आयोजना गरिएको विकले बताए ।

काठेखोला गाउँपालिकाका अध्यक्ष राजु थापाले प्रतियोगितामा गाउँपालिकाको प्रचलित एवम् पौराणिक कला, संस्कृतिहरुको संरक्षण, सम्बद्र्धन र प्रदर्शन गर्ने जानकारी दिए । अध्यक्ष थापाले प्रतियोगिताको माध्यमबाट गाउँपालिकामा रहेका संगीत संग्राहलय र जनजाति संग्राहलयको प्रचारप्रसार गरिने बताए ।

सोमवार बागलुङ बजारमा आयोजित पत्रकार सम्मेलनमा पालिकाका अध्यक्ष थापाले अध्यक्ष कपको लोगो सार्वजनिक गरे । प्रतियोगितामा वडास्तरीय पुरुष भलिबल प्रतियोगिता, दोस्रो काठेखोला लोकतारा-२०८० (गायन प्रतियोगिता), दोस्रो काठेखोला गजल प्रतियोगिता, सामुहिक नृत्य प्रतियोगिता, खुल्ला ताराखेल प्रतियोगिता, व्याडमिन्टन प्रतियोगिता, काठेखोला प्रतिभा सम्मान-२०८०, सोरठी, पञ्चेवाजा, भजन लगायतका स्थानीय झाँकी प्रदर्शनी र यानीमाया, झाम्रे, सालैजो लगायतका सांगीतिक प्रस्तुति हुनेछ ।
वडास्तरीय पुरुष भलिबल प्रतियोगिताको प्रथमले रु.१ लाख, द्धितियले ६० हजार र तृतीयले ३० हजार नगद र शिल्ड प्राप्त गर्नेछन् ।

दोस्रो काठेखोला लोक तारा-२०८० (गायन प्रतियोगिता) तीन चरणमा संचालन गरिनेछ । पहिलो चरण र दोस्रो चरण भीमसेन माविको सभाहलमा संचालन हुने र अन्तिम चरणको कार्यक्रममा ७ जना प्रतियोगितहरु वीच अक्षेते बजारमा संचालन गरिनेछ । लोकतारा विजेताले नगद रु. ३० हजार, फष्ट रनरअफले रु.२० हजार, सेकेन्ड रनरअपले रु.१० हजार प्राप्त गर्नेछन् ।

गजल प्रतियोगितामा प्रथम हुनेले नगद रु. १५ हजार, द्धितियले रु. १० हजार र तृतीयले रु.५ हजार प्राप्त गर्नेछन् । सामुहिक नृत्य प्रतियोगिताको प्रथमले नगद रु. २० हजार, द्धितियले रु.१५ हजार र तृतीयले रु.१० हजार प्राप्त गर्नेछन् । खुल्ला ताराखेल प्रतियोगिताको विजेताले नगद रु. ५० हजार र द्धितियले रु. ३० हजार पुरस्कार पाउने पालिकाले जनाएको छ ।
व्याडमिन्टन प्रतियोगिताको विजेताले नगद रु.१० हजार र द्धितियले रु. ५ हजार प्राप्त गर्नेछन् । प्रतियोगिताको लागि गाउँपालिकाले रु. २० लाख रकम विनियोजन गरेको गाउँपालिकाका प्रमुख प्रशासकीय अधिकृत खगराज गौतमले बताए । यसको लागि गाउँपालिकाको १३ औं गाउँसभाबाट रु. ५ लाख र १४ औं गाउँसभाबाट रु.१५ लाख गरी रु.२० लाख रकम विनियोजन गरिएको हो ।

कार्यक्रम संचालनको लागि गाउँपालिकाका प्रवक्ता तथा कला संस्कृति तथा खेलकुद विकास समितिका संयोजक टिकासंगम विकको संयोजकत्वमा ५ सदस्य सचिवालय गठन गरिएको छ । सचिवालयको सदस्यमा कृष्ण प्रसाद कँडेल, डिल बहादुर कार्की, बाबुराम भण्डारी र मनोज कार्की रहेका छन् ।