कोरोना संकट अघि गलकोट नगरपालिका–२ को स्वास्थ्यचौकीबारे स्थानीयलाई खासै चासो थिएन । कोरोनाको बेला क्वारेन्टाइन र आइसोलेसन समेत बनाएर प्रभावकारी उपचार सेवा प्रवाहपछि आम नागरिकको विश्वास पलायो । त्यसपछि वडा अध्यक्ष हिमबहादुर भण्डारीले पनि यो स्वास्थ्यचौकीलाई स्वास्थ्य सेवा मात्र नभई ल्याब सहितको उपचार सेवा दिने, बर्थिङ सेन्टर बनाउने लगायतको काममा चासो बढाए । उक्त चासोले काममा मुर्तरुप लियो । अहिले भिडियो एक्सरे सेवा संचालनमा छ । नगरपालिकाको सहयोगमा जडान भएको भिडियो एक्सरेले दुर्घटनामा परेका बिरामीदेखि गर्भ परीक्षण समेत स्वास्थ्यचौकीमा संभव भयो । स्वास्थ्यचौकीमै पोषण केन्द्र बनेपछि बालबालिकामा हुने कुपोषण अन्त्य गर्न सहज भएको छ । त्यतिमात्र होइन भीमापोखरा युवा क्लब (बिवाईसी) र फेयरमेड फाउण्डेसनले १८ हजार लगानी गरेर सेमी अटो एनलाइजर मेसिन जडान गरिदिएको छ ।
स्वास्थ्यचौकीमा २ लाख ६० हजार रुपैयाँ लगानी गरेर अपांङ्गमैत्री शौचालय निर्माण गरिंदैछ । ‘एउटा स्वास्थ्यचौकी पुरा क्षमतामा चल्ने बनाउन प्रयास गरेका हौं’ वडाध्यक्ष भण्डारीले भने, ‘यो अभियानमा नगरपालिका र जिल्लाका अन्य संघसंस्थाले पनि साथ दिएका छन् ।’ स्वास्थ्यचौकीसँगै सुत्केरी कुरुवा घर पनि बनेको छ । संरचनात्मक सुधारमा नगर र वडाले यहाँ २० लाख लगानी गरेको छ । स्थानीय हर्कबहादुर कुँवरले पनि १ लाख २० हजार रुपैयाँका उपकरण खरिद गरिदिएपछि स्वास्थ्यचौकीमा सबैखाले सेवा संचालनमा छन् ।
नगरको अस्पताल मात्र हैन, सबै स्वास्थ्यचौकी पनि सक्षम बनाउने अभियानमा लगानी गरिएको नगर प्रमुख भरत शर्मा गैरेले बताए । योजनाबद्द काम गर्दा सबै स्वास्थ्य संस्थाहरु नरेठाँटी र हटियाका जस्तै बन्ने उनले बताए । ‘नगर भित्रका ११ वटै वडाका सबै स्वास्थ्य संस्था समान र गुणस्तरीय सेवा दिने बनाउने हो’ गैरेले भने, ‘नगरको श्रोतले नपुगेपनि दाताको पनि खोजी गर्दैछौं ।’ देखिने गरी स्वास्थ्यमा सुधार गर्ने योजना उनले सुनाए ।
गलकोट नगरपालिका वडा नं. २ ले मध्यपहाडी लोकमार्गको बिकल्पको सडकमा पनि काम गरेको छ । ग्रामीण सडक मर्मत र पक्की पुल बनाएर मध्यपहाडी लोकमार्गको बिकल्पको रुपमा प्रयोग गर्ने बनाइएको हो । काठेखोलाको रगेनीदेखि तोरीखोलाहुँदै नरेठाँटी निस्कने सडक स्तरीय बनेको हो । यो सडक लोकमार्गभन्दा ७ किमी छोटो छ । ‘आन्तरिक श्रोतबाट गर्न सकिने काम सम्पन्न भएको छ, अब पक्की बनाउनु पर्छ भनेर पहल गरेका छौं’ स्थानीय भक्तबहादुर घर्तीमगरले भने, ‘वडा र नगरले पहल गर्दा छिट्टै यो सडक कालोपत्रे गर्न सकिन्छ ।’
वडाध्यक्ष भण्डारीले यो बिषयमा पहल भैरहेको बताए । नरेठाँटी बजार किनारमा रहेको चुक्तीखोलामा पक्की पुल पनि बनेको छ । यो पुलले मध्यपहाडी लोकमार्गसँग नरेठाँटी बजार, स्वास्थ्यचौकी, तोरीखोला होमस्टे र रगेनीहुँदै बिकल्पको बाटो यात्रा गर्न पनि सहज भएको हो । हिउँदमा त यो सडक ४० मिनेट छोटो भैसकेको छ ।
त्यस्तै, सबै बस्ती समेट्ने गरी तोरीखोलादेखि ठानाहुँदै वडा नं. ६ जोड्ने सडक निर्माणको काम पनि शुरु भएको छ । १२ लाख खर्चेर नरेठाँटीदेखि गौघाट जाने सडकको पक्की नाली, सडक ग्राभेल, राम्चेमा ग्याबिन जाली र ठानमा मेसिनरी पर्खाल बनाइसकिएको हो । बर्षात्मा जोखिम हुने क्षेत्र हेरेर ती खण्ड स्तरीय बनाइएको हो । यी दुइ सडकले तोरीखोलाको होमस्टे प्रवद्र्धनमा सहयोग पुग्ने अबस्था आएको स्थानीय बिष्णु सुनारले बताइन् । ‘यातायात सहज चल्दा खाद्यान ल्याउन मात्र हैन, किसानको तरकारी बजार पठाउन पनि सहयोग मिलेको छ’ सुनारले भनिन्, ‘गाउँको उत्पादनले बजार पाएको छ ।’ तोरीखोला र बयलीडाँडाका किसानले प्लाष्टिकका टनेलमा तरकारी फलाएर बेचेका छन् ।
शिक्षामा गुणस्तर दिन कक्षाकोठा सुधारमा ध्यान दिइएको छ । यहाँका ४ वटा बिद्यालयमा शैक्षिक सामाग्री व्यवस्थापन, बिज्ञान प्रयोगशाला, पुस्तकालय र बिद्यार्थीको बसाई व्यवस्थापनमा ७ लाख लगानी भएको हो । पैयुँडाँडा प्राबिलाई महेन्द्र माबिमा मर्ज गरिएको छ भने सितलपाटी आधारभूत बिद्यालयमा बिज्ञान प्रयोगशाला बनाइएको छ । महेन्द्र माबिमा कक्षाकोठा व्यवस्थापन, जीर्ण भवन ढलान गरिएको छ । रामकृष्ण प्राबिमा फर्निचरको व्यवस्थापन गरिएको हो । बालबालिका सहज बस्ने, पढ्ने व्यवस्थापनले गुणस्तर सुधारमा साथ मिल्ने उनले बताए ।
चुक्ती र गौंदीखोलाबाट बजार क्षेत्र बचाउन तटबन्धन गरिएको छ । नरेठाँटी बजार पुग्ने दुइवटा पक्की पुल बनेका छन् भने बजार भित्रको बाटो ढलान गरिएको छ । पुराना बजारको संरचना यथाबत राखेर सडक भने पक्की बनाइएको हो । खोलाबाट जोगाउन गरिएको तटबन्धनमा मात्रै गण्डकी प्रदेशको १५ लाखमा वडा र नगरको बजेट समेत २० लाख बढी खर्चेर बजार क्षेत्र सुरक्षित गरिएको हो ।
सबै वडाले पर्यटन र अन्य महत्वकांक्षी योजना संचालन गरेकोमा वडा नं. २ ले भने महत्वपूर्ण गन्तव्यमा साथ दिने नीति लिएको छ । ‘हाम्रोमा पर्यटन क्षेत्र नभएका होइनन्, तर महत्वपूर्ण गन्तव्यमा लगानी गरौं भनेर सहयोग गरेका छौं’ भण्डारीले भने, ‘टेउवा, कोतघर र घुम्टेमा लगानी गर्दा हाम्रो पनि साथ पुग्छ ।’ बरु सबै घरमा शुद्ध खानेपानी खुवाउने योजनामा गलकोटमै पहिलो वडा बनेको उनले बताए ।
गलकोट नगरपालिकाको आफ्नै सभाहल बनेको छ । यो वडा नं. २ को कार्यालय सँगै छ । नगरसभादेखि बिभिन्न महत्वपूर्ण कार्यक्रम यही गर्न सकिन्छ । यो भवन नगरस्तरीय गौरवको आयोजना समेत हो । गौरवको आयोजना बनाएपछि सबै विकास मेरोमा चाहिन्छ भन्ने होइन, आवस्यकता अनुसार बजेट बिनियोजन गर्नुपर्छ भन्ने सन्देश दिन पर्यटनका योजना अन्य वडामा लगानी गरिएको उनले सुनाए । बालमैत्री नगर भैसकेकोले हरेक सेवा प्रवाहलाई सोही प्रकारको बनाउने, कार्यालय व्यवस्थापन, समयमा काम सक्ने र फरफारक गर्ने तथा पारदर्शीता बनाउने काममा पनि पहल गरेको भण्डारीको दावी छ ।
