पर्वत/फलेवास नगरपालिका–३ शंकरपोखरी पानीको समस्या भएको जिल्लाकै सबैभन्दा पीडित ठाउँमा पर्छ । पहाडको टाकुरो भएकोले पानीको मुहान नै नहुँदा शंकरपोखरीबासीले भगवानको पूजा गर्दा समेत पानीको माग पूरा गरिदिन कामना गर्थे । खरो लागेको बेला एक गिलास पानी पाउनुभन्दा ‘कोल्ड ड्रिँक्स’ ले प्यासले मेटाउनुपर्ने बाध्यता शंकरपोखरीमा छ ।
शंकरपोखरी डाँडा, पुर्कोट, चाम्लेश्वार, कुँडापानी, पोखराचौर, लगायतका क्षेत्रमा वर्षौँदेखि पानीको समस्या रहँदै आएको छ । बाटो हिँड्दै गरेका बटुवाले प्यास लागेर पानी माग्दा समेत दिन नसकिने अवस्था शंकरपोखरीमा छ । किनकि एक गाग्री पानीको लागि आधादेखि एक घण्टा टाढा रहेका सामान्य धारा र कुवामा निर्भरता छ । लामो समय पालो पर्खिँदा पाएको एक गाग्री पानीले पिउन त नपुग्ने अवस्थामा चौपायाको प्यास र सरसफाइको काम गर्न उस्तै सकस छ ।
पानीको हाहाकार रहेको शंकरपोखरीको पुर्कोटमा गत बिहीबार प्रतिसेकेन्ड चार लिटरका दरले पानी झ¥यो । अनि गाउँलेहरू एकै ठाउँमा भेला भए, गाउँमा अमृत झरेको भन्दै पाइपबाट खस्दै गरेको पानी हातमा थापेर सिरमा लगेर छर्किए । एक थुर्मी पानीको लागि थुक निल्नुपर्ने गाउँमा एकाएक पानीको फोहरा चलेपछि पुर्कोटबासीमा जीवनको सबैभन्दा खुसी त्यही जस्तो देखिन्थ्यो ।
वडाध्यक्ष अर्जुनबहादुर कार्कीका अनुसार शंकरपोखरीकै धारापानीदेखि पुर्कोटतर्फ करिब एक सय मिटरको दूरीको उचाइमा डिप बोरिङ गरेर पानी निकालिएको छ । सानातिना योजनाले पानीको आपूर्ति नै गर्न असम्भव रहेको शंकरपोखरीमा तत्कालका लागि करिब १० लाख रुपैयाँको लागतमा सुरु गरिएको बोरिङको पानीले करिब दुई सय ५० परिवारलाई आवश्यक पानी आपूर्ति हुने भएको छ ।
‘यत्रो ठुलो वडा नै खानेपानीको ठुलो समस्या छ । हाम्रै यति ठुलो गाउँमा दुई÷तीन ओटा कुवा र धारा मात्रै छन्, ती पनि नजिकमा त कहाँ हो र ?’, स्थानीय गङ्गा थापा भन्छिन्, ‘डोकोमा गाग्री बोकेर पानी ओसार्दै एक जनलाई ठिक्क हुन्छ । यस्तो ठाउँमा पाइभरीको पानी आयो। अब त ढुक्कले पानी खान पाउने भइयो ।’
पानीको यो आपूर्ति भने सरकारले नभई स्थानीय निर्माण व्यवसायी गिरिजाप्रसाद तिवारीले आगामी दिनमा स्रोतको खोजी गर्ने गरी गरेका हुन् । लाखौँ लगानी गरेर लमाए खोलाको पानीलाई ‘लिफ्ट’ गरेर वितरणका लागि काम चलिरहेको भए पनि त्यसले मात्रै आवश्यकता पूरा नहुने अवस्था छ । पानीको आपूर्तिलाई सहज बनाउनकै लागि निर्माण व्यवसायी तिवारीले आउँदा दिनमा कुनै स्रोतको खोजी गर्ने तर तत्कालका लागि गाउँलेको प्यास मेटाउने उद्देश्यले १० लाख लगानी गरेका वडाध्यक्ष कार्कीले बताए ।
‘पानीको साह्रै समस्या भएपछि तिवारी जी ले स्रोतको सुनिश्चित नहुँदा नहुँदै पनि १० लाख बढी लगानी गरेर गाउँमा पानी झार्नुभएको छ । यसले यो वडाका करिब साढे दुई सय घरमा पानीको सहज आपूर्ति हुन्छ’, उनले भने, ‘पानीकै अभावले बसाईसराईँदेखिका अन्य समस्या भोग्दै आएका गाउँलेलाई अब राहत भएको छ । अहिले पुर्कोटमा लगातार पानी झरिरहेको छ ।’
‘बोरिङ’ बाट तानेको पानीलाई पुर्कोट र शंकरपोखरी डाँडा गरेर दुई ठाउँमा रहेका ‘रिजर्भवेयर ट्याङ्की’ मा खसालिने छ । पुर्कोटमा रहेको ‘ट्याङ्की’ बाट आपूर्ति हुने पानी पुर्कोट सहित कुँडापानीको मानमेला, चाम्लेश्वार, चुचनदेउराली लगायतका स्थानमा पुग्ने छ भने डाँडामा रहेको ट्याङ्कीले सोही आसपासका स्थानीयलाई सुविधा हुने छ । पुर्कोटमा स्याङ्जासँग सिमाना जोडिएको डहरे देउरालीबाट आएको पुरानो योजनाको पाइप विस्तार कायमै रहेकाले सोही पाइपलाइनमा पानी जडान गर्दा तत्कालै आपूर्ति सुरु भएको छ ।
तर शंकरपोखरी डाँडामा रहेको ट्याङ्कीमा पुरानो योजनाका संरचना नहुँदा तत्कालै पानी पठाउन नसकिने भएको छ । पुर्कोटमा शाखा लाइन निर्माणको काम समेत पूरा भइसकेकोले पानीको आपूर्ति नियमित बनेको र तत्कालै ‘मिटर’ जडानको काम थालिने छ । शंकरपोखरी डाँडामा रहेको ‘ट्याङ्की’ बाट भने करिब एक महिनाभित्रमा पानी वितरणको काम सुरु गर्ने वडाध्यक्ष कार्की बताउँछन् ।
शंकरपोखरीमा गाउँबाट निकै तल रहेको लमाए खोलाबाट ‘लिफ्ट’ योजनामार्फत पनि पानीको आपूर्ति गर्ने काम अन्तिम चरणमा छ । केही समय पहिला जोडिएको ‘मोटर’ मा समस्या देखिएपछि अहिले पानी नआएको र अब नयाँ ‘मोटर’ जोडेपछि लमाएको पानी समेत वितरण सुरु हुने छ । यी दुवै योजनामार्फत आउने पानीले एकद्धार प्रणालीबाट आवश्यकता अनुसारका ‘ट्याङ्की’ मा खसालेर ‘मिटर सिस्टम’ मार्फत पानीको आपूर्ति गरिने वडाध्यक्ष कार्कीले बताए ।