लमजुङ/ हिमालपारीको मनाङ जिल्लाबाट ७ जना विद्यार्थीमात्रै एसईईमा उत्तीर्ण भएका छन । कुल ३९ जनाले परीक्षा दिएकोमा विहीबार प्रकाशित नतीजा अनुसार ३२ जना अनुत्तीर्ण भएको शिक्षा विकास तथा समन्वय इकाई मनाङका प्रमुख सुदीप गिरीले जानकारी दिए ।
उनका अनुसार ७ जनामध्ये सदरमुकाम चामेमा रहेको लोकप्रिय माविबाट एसईई दिएका जयराम थापाले सवैभन्दा बढी ३.३९ जीपीए ल्याएका छन । लोकप्रियबाट १७ जनाले एसईई दिएकोमा थापासहित ४ जना उत्तीर्ण भएका छन् । लोकप्रिय खुलाबाट ३ जनाले एसईई दिएकामा ३ जना नै अनुत्तीर्ण भएका छन् ।
तल्लो मनाङस्थित नासों गाउँपालिकामा रहेको प्रकाशज्योति माविबाट १९ जनाले एसईई दिएकामा ३ जनामात्रै उत्तीर्ण भएका छन् । माथिल्लो मनाङस्थित अन्नपूर्ण माविबाट १ जनाले एसईई दिएकोमा उनी पनि अनुत्तीर्ण भएको इकाई प्रमुख गिरीले बताए । तल्लो मनाङको तालस्थित भानु मावि भने २ वर्षअघि बाढीले डुबानमा परेपछि विद्यार्थी संख्या कम हुँदै गएको र कक्षा १० मा विद्यार्थी नभएपछि भानु मावि एसईइमा सहभागी भएन ।
