मुक्तक-१
बेहोसीमा पनि होस होस् नयाँ वर्षमा
आलस्यबीच जोस होस् नयाँ वर्षमा
अभावै अभावमा दबिएकाहरूको पनि,
जीवन धान्न पुग्ने कोष होस् नयाँ वर्षमा।
मुक्तक-२
तिर्खाएकाहरूले प्यास मेटाउन् नयाँ वर्षमा
बिराएकाहरूले बाटो भेटाउन् नयाँ वर्षमा
कैंची हैन सियो बनेर जिउन सकियोस्,
कसैले सम्बन्धहरू नरेटाउन नयाँ वर्षमा।
मुक्तक-३
खेतबारीमा उत्पादन भव्य होस् नयाँ वर्षमा
समाज पनि झन्-झन् सभ्य होस् नयाँ वर्षमा
दोष अरूलाई देखाउँदैमा आफू सफा भइँदैन,
पूरा गर्ने आआफ्नो कर्तव्य होस् नयाँ वर्षमा।
मुक्तक-४
खराब दिनहरू सबै हटून् नयाँ वर्षमा
लागेका रिनहरू सबै घटून् नयाँ वर्षमा
जे जति हुनुपर्ने, भइरहेको छैन देशमा,
ग्रहदशाहरू सबै कटून् नयाँ वर्षमा।
मुक्तक-५
भोकाहरूका लागि खाना बनोस् नयाँ वर्ष
नाङ्गाहरूका लागि नाना बनोस् नयाँ वर्ष
कोही दबिएको, हेपिएको सुन्न नपरोस् हजुर,
आवाजविहीनहरूको गाना बनोस् नयाँ वर्ष।
मुक्तक-६
सबै बालबालिका भर्ना हुन नयाँ वर्षमा
काम बढी तर कम धर्ना हुन नयाँ वर्षमा
विश्वास, सद्भावमय, सहयोग बढिरहोस्,
एक आपसमा अर्मापर्मा हुन नयाँ वर्षमा।
मुक्तक-७
गर्न चाहनेले काम पाओस् नयाँ वर्षमा
राम्रो गर्नेहरूले नाम पाओस् नयाँ वर्षमा
गोलीले ढल्नु र आगोले जल्नु नपरोस्
रावण हैन देशले राम पाओस् नयाँ वर्षमा।
