पोखरा/ यातायात व्यवसायीले आन्दोलन चर्काउँदै लगेपछि संघीय सरकारले गण्डकी प्रदेश सरकारलाई ‘राइड सेयरिङ’ सम्बन्धी नियमावलीको कार्यान्वयन तत्काल रोक्न निर्देशन दिएको छ । प्रधानमन्त्री तथा मन्त्रिपरिषद् कार्यालयमार्फत पठाइएको पत्रमा, नियमावली स्थगन गरी सार्वजनिक यातायात सामान्य अवस्थामा ल्याउन सहयोग पु¥याउन आग्रह गरिएको छ ।
गण्डकी प्रदेशको मुख्यमन्त्री कार्यालयलाई लेखेको पत्रमा भनिएको छ, ‘यातायातसम्बन्धी महासंघ र संघसंगठनले आह्वान गरेको सार्वजनिक यातायात बन्दको कार्यक्रमले जनजीवन असहज भइरहेको सन्दर्भमा सार्वजनिक यातायात बन्दको कार्यक्रम फिर्ता गरी जनजीवनलाई सामान्यीकरण गर्ने वातावरण निर्माणका लागि गण्डकी प्रदेश सरकारलगायत प्रदेश सरकारहरुलाई नियमावलीमा उल्लेखित राइड सेयरिङसम्बन्धी प्रावधानको कार्यान्वयन हाललाई स्थगन गर्न मन्त्रीस्तरको निर्णयअनुसार अनुरोध भइ आएकोले उक्त निर्णय कार्यान्वयनको लागि पठाइएको छ ।’
पत्र प्राप्त भएपछि धारणा बनाउन प्रदेश सरकार छलफलमा जुटेको छ । प्रदेश सरकारको बैठकपश्चात् धारणा सार्वजनिक गर्ने तयारी छ । सोमबार राति सार्वजनिक यातायात बचाउ संघर्ष समिति र सरकारबीच भएको ६ बुँदे सहमतिअनुसार नियमावली स्थगन गर्न आग्रह संघ सरकारले गरेको हो ।
