बागलुङ/बागलुङको जैमिनी नगरपालिकाले बिपन्न नागरिकको निशुल्क उपचारका लागि स्थापना गरेको “जैमिनी स्वास्थ्य उपचार कोष” बृद्धि गरेको छ । चालु आर्थिक बर्षको बजेटमार्फत २५ लाख रुपैयाँ जम्मा गरेर प्रारम्भ भएको कोषमा नगरले आगामि आर्थिक वर्षका लागि थप २५ लाख बजेट बिनियोजन गरेको हो ।
नगरले कोषमा योगदान गर्न चाहने सर्वसाधारणका लागि चालु आर्थिक बर्षबाट कार्यबिधि तयार गरेर खुल्ला गर्ने भएको हो । सोमबार जैमिनी नगरपालिकाको १७ औं नगरसभामा आगामि आर्थिक बर्षको बजेट तथा कार्यक्रम प्रस्तुत गर्दै उपप्रमुख हरिहर शर्माले कोषलाई प्रभावकारी बनाइने बताए । उपचार खर्चको अभावमा जैमिनीबासी कसैलाई पनि उपचारबाट बञ्चित नगर्नेगरी कोष बनाउन थालिएको हो ।
त्यस्तै नगरले स्वास्थ्य क्षेत्रको सुधारका लागि स्वयंसेविका प्रोत्साहन, स्वास्थ्य संस्थाका संरचना निर्माणदेखि स्वास्थ्य शिविरसम्मका कार्यक्रमका लागि बजेट विनियोजन गरेको छ । जैमिनी नगरपालिकाले आगामी आर्थिक वर्षभित्रै नगरलाई बालमैत्री नगर घोषणा गर्ने भएको छ । बालमैत्री नगर तयार गर्न दुई करोड बजेट विनियोजन भएको छ ।
नगरले लिड विद्यालय, जैमिनी संस्कार शिक्षाका लागि बजेट विनियोजन गरेको छ । जैमिनीकी छोरी कार्यक्रमलाई निरन्तरता र सुकुम्बासी मुक्त नगरपालिका घोषणा कार्यक्रम बजेट मार्फत सार्वजनिक भएका छन् । जैमिनीले किसान परिचयपत्र युक्त नगरपालिका घोषणा गर्न आठ लाख रुपैयाँ बिनियोजन गरेको छ । नगरपालिकाले आगामि आर्थिक वर्षका लागि ७५ करोड ४ लाख रुपैयाँ बजेट बिनियोजन गरेको छ ।
