म्याग्दी/म्याग्दीको पर्यटकीयस्थल अन्नपूर्ण गाउँपालिका–६ स्थित घोडेपानी–पुनहिल क्षेत्रमा एक बर्षमा ३० हजारभन्दा बढी पर्यटकले भ्रमण गरेका छन् ।
राउण्ड अन्नपूर्ण अन्तर्गतको प्रशिद्ध पर्यटकीयस्थलमा कास्कीको पोखरा–नयाँ पुल, घान्दु्रक हँुदै घोरेपानी र यता म्याग्दी सदरमुकाम बेनी–तातोपानी, घारा, शिखहुँदै घोरेपानी र नागी लगायतका क्षेत्रबाट गत आर्थिक बर्ष २०८१/०८२ सालमा ३० हजार ८ सय ८५ जना पर्यटकले भ्रमण गरेको पर्यटक प्रहरी चौकी घोडेपानीले जनाएको छ ।
समुदी सतहबाट तीन हजार २१० मिटरको उचाइमा अवस्थित पुनहिलबाट मनोरम हिमश्रंखलाको अवलोकन गर्नका लागि सवारीसाधन तथा पदैलमार्गबाट घोडेपानी जाने गरिन्छ ।
जिल्ला प्रहरी कार्यालय म्याग्दीका प्रहरी निरीक्षक सागर पौडेलले दिएको जानकारी अनुसार घोडेपानी आगमन २३ हजार ८६८ जनामध्ये पुरुष १२ हजार ३९६ जना र महिला ११ हजार ४७२ जना रहेका छन् ।
त्यसैगरी घोडेपानी र पुनहिल आसपासको अवलोकन गरी बाहिरीने ६ हजार ९ सय ९७ जनामध्ये पुरुष ३ हजार ६२१ जना र महिला ३ हजार ३ सय ७६ जना रहेका छन् ।
घोडेपानी र पुनहिलमा सबैभन्दा धेरै पर्यटक कात्तिक महिनामा ४२ सय १३ जना रहेकोमा सबैभन्दा कम असार महिनामा ४ सय ४९ जना छन् । पर्यटक प्रहरी चौकी घोडेपानीले घोडेपानी भित्रिने र बाहिरिने पर्यटकको विवरणसहितको अभिलेख राख्दै आएको छ ।
घोडेपानीमा विदेशीसँगै आन्तरिक पर्यटकले भ्रमण गर्ने गरेको घोडेपानी होटल ब्यवस्थापन समितिकी अध्यक्ष मिना पुनले बताए । ‘सडक सञ्जाल बिग्रिएकाले आन्तरिक पर्यटकको संख्या घटेको छ, सडकलाई सहज बनाउन सकेमा पर्यटक धेरै पर्यटक ल्याउन सकिन्छ,’ अध्यक्ष पुनले भनिन् ।
पोखरेबगरबाट घार–खिवाङ–शिख–चित्रे सडकअन्तर्गत अन्नपूर्ण–५, घोप्टेखर्कमा सडक अहिले पनि सहज छैन । घोडेपानी जाने पर्यटकले प्रयोग गर्ने पोखरेबगर–चित्रे–घोडेपानी सडकअन्तर्गत लुलीया र हल्लेखर्कको घुम्तीमा सडक भासिएपछि बस सञ्चालन हुन नसक्दा अघिल्लो बर्ष आन्तरिक पर्यटकको संख्यामा कमी आएको होटल ब्यवसायी समितिकी अध्यक्ष पुनको भनाइ छ । म्याग्दीमा घोडेपानीबाहेक अन्य पर्यटकीयस्थलमा गएका विदेशी पर्यटकको स्थानीय प्रहरी, सरकारी निकायले तथ्याङ्क राख्ने गरेका छैनन् ।
