पोखरा/संघीय संरचना लागु भएपछि स्थानीय तहहरुलाई आफ्नो क्षेत्रको आवस्यकतानुसार नीति, योजना र कार्यक्रम बनाउन अधिकार दिइएको छ । स्थानीय तहहरुले पनि कृषि, पशुपालन, पर्यटन, उर्जा, पूर्वाधारलगायतको विकासको नारा अघि सार्दै आफ्नो लक्ष्य प्राप्तिमा अघि बढेका छन् ।

स्थानीय तहहरुले कृषि क्षेत्रलाई नै बढी प्राथमिकतामा राखेको पाइन्छ । कृषि उत्पादन वृद्धि, बजारको पहुँच, किसानको आयमा बृद्धि गर्न विभिन्न प्रयासहरु अघि सारेका छन् । यसले स्थानीय अर्थतन्त्र सवलीकरण, खाद्य सुरक्षाको सुनिश्चितता र किसानलाई व्यवसायिक खेतीमा आकर्षित गर्ने वातावरण निर्माणमा योगदान पु¥याईरहेका छन् । यसैक्रममा कास्कीका अन्नपूर्ण र रुपा गाउँपालिकाले पनि कृषिलाई प्राथमिकतामा राखेर विभिन्न कार्यक्रमहरु गर्दै आएका छन् ।

कास्कीको अन्नपूर्ण गाउँपालिका–३ मराउचेका गोविन्द पौडेलले सिजन अनुसार तरकारी खेती गर्छन् । उत्पादित तरकारी कहाँ लगेर बेच्ने भन्ने चिन्ता उनमा छैन । गाउँपालिकाले सञ्चालनमा ल्याएको कृषि उपज संकलन तथा विक्री केन्द्रमा उनको उत्पादन खरीद हुन्छ । ‘केन्द्रबाटै घरमै आएर तरकारी लगिदिन्छन्’, पौडेलले भने, ‘गाउँपालिकाले राम्रो काम गरिदियो, म खुशी छु ।’ केन्द्रबाट उनीजस्ता ७० देखि ८० किसान दैनीक लाभान्वित हुदै आएका छन् ।

कृषि, पर्यटन, उर्जा र पूर्वाधार अन्नपूर्णको समृद्धिको आधार नारालाई अघि सारेको अन्नपूर्णले कृषिमा प्रविधिको प्रयोग, कृषि उपज संकलन केन्द्रमार्फत विक्री वितरण, उन्नत विऊविजन, सिंचाई प्रणाली, कृषक प्रोत्साहन, पशु र दुग्धमा अनुदान दिदैँ आएको छ ।

कृषि उपज संकलन तथा विक्री केन्द्र सञ्चालन एक मुख्य उपलब्धीको रुपमा लिएको छ । साना किसानको उत्पादनलाई एकीकृत गरी सहज रुपमा बजारको पहुँच पु¥याउन र यसमा संलग्न किसान, व्यापारी, उपभोक्ता सवैका लागि स्वस्थ प्रतिस्पर्धात्मक बजार प्रणालीको विकास तथा व्यवस्थापन गर्न वडा २ को चुहीने पहरास्थित मध्यपहाडी राजमार्गसंगै अन्नपूर्ण कृषि उपज संकलन तथा बिक्री केन्द्र सञ्चालनमा ल्याएको हो ।

अन्नपूर्ण गाउँपालिकाको कृषि शाखा प्रमुख जुनु जिमीले झन्डै ८ महिना अघि सञ्चालनमा ल्याइएको केन्द्रले किसान प्रत्यक्ष लाभान्वित भएको बताइन् । ‘किसानको उत्पादन खेर जान पाएको छैन्’, उनले भनिन्, ‘केन्द्र सञ्चालनमा लिबर्ड नामक संस्थाको पनि सहयोग छ ।’

यसका साथै कृषिसंग सम्बन्धित निकायको संलग्नता र सहभागितामा सूचना प्रवाह, जनचेतना, तथ्यांक संकलन, कृषि उपजको बजारीकरण तथा अनुगमनमा सहजीकरण गर्ने उद्देश्यले पालिकाले कृषि उद्यमी, कृषक समुह, कृषि सहकारी र प्रत्येक वडामा कृषक सञ्जाल गठन गरेको छ । बीउ बैंकको स्थापना अन्नपूर्णको उदाहरणीय काम हो ।

गाउँपालिकाले संभाव्यता र उपलब्ध स्रोत साधनलाई मध्यनजर गर्दै प्रत्येक वडामा पकेट कार्यक्रम सञ्चालन गर्दै आएको छ । वडाको विशेषता अनुसार कफी, कोदो, मौरी, सुन्तला लगायत पकेट सञ्चालन गरी क्षेत्र विस्तारका कामहरु गरिरहेको छ । गड्यौले मल बनाउने घर बनाउने कार्यक्रम सञ्चालन भइरहेको छ भने एक घर एक टनेल, कृषि बीमा, किसानलाई प्रतिलिटर दुधमा एक रुपैयाँ अनुदान तथा पंक्षी पालक किसानलाई कुखुरा चल्ला खरीदमा २५ प्रतिशत अनुदान दिदै आएको छ । यसले पालिका दुग्ध तथा मासुजन्य पदार्थमा आत्मनिर्भर भई निकासी समेत गर्न सफल भएको गाउँपालिका अध्यक्ष विष्णुबहादुर केसीको भनाई छ ।