लमजुङ/लमजुङको दोर्दी गाउँपालिकाले ‘एक वडा, एक रात, एक छाक’ कार्यक्रम सञ्चालन गरेको छ । गाउँपालिकाका गाउँलाई पर्यटकीय गाउँ बनाउने उद्देश्यले गाउँपालिकाले उक्त कार्यक्रम ल्याएको हो ।
नीति तथा कार्यक्रममार्फत गाउँपालिकाले चालु आर्थिक वर्षबाट उक्त कार्यक्रमल्याएको हो । कार्यक्रमका लागि गाउँपालिकाले पर्यटन प्रवद्र्धन कार्यक्रमअन्तर्गत बजेट व्यवस्थापन गरेको गाउँपालिकाले जनाएको छ ।
गाउँपालिकाले केही समयअघि वडा नं. ८ को खिन्चोक गाउँबाट ‘एक वडा, एक रात, एक छाक’ कार्यक्रम सुरुवात गरेको छ । गाउँपालिकाले होमस्टे प्रवद्र्धनका लागि अन्तरक्रियासहित खिन्चोकबाट कार्यक्रमको सुरुवात गरेको गाउँपालिकाका अध्यक्ष युवराज अधिकारीले बताए ।
उनका अनुसार, होमस्टे सञ्चालन सुरु गरिएका वडाहरुमा चालु आर्थिक वर्षबाट ‘एक वडा, एक रात, एक छाक’ कार्यक्रम लागू हुनेछ । कार्यक्रमअन्तर्गत गाउँ कार्यपालिकाको घुम्ती बैठकहरु राख्ने, सामाजिक संघसंस्थालाई होमस्टे गाउँमा बैठक राख्न तथा घुम्न प्रेरित गर्ने, आन्तरिक तथा बाह्य पर्यटक प्रवद्र्धनका कार्यक्रमहरु सञ्चालन गरिने छ ।
दोर्दीमा वडा नं. २ को सल्लाबोट, ३ को श्रीमञ्ज्याङ लामागाउँ, ६ को ताँजे, ७ को लप्सीबोट दैलुङ, ८ को टापगाउँ र खिन्चोकगाउँ र ९ को माझगाउँ गरी ७ वटा होमस्टेहरु दर्ता गरी सञ्चालनमा ल्याएका छन् । यी गाउँहरुका झण्डै ५० घरमा होमस्टे सञ्चालन गरिएको गाउँपालिका रोजगार संयोजक धर्मराज गुरुङले जानकारी दिए । होमस्टेमा करिब २ सय २५ बढी पर्यटकलाई राख्न सकिने गरी व्यवस्थापन गरिएको छ ।
कार्यक्रमअन्तर्गत होमस्टे सञ्चालन र व्यवस्थापन सम्बन्धी अन्तरक्रिया, आवश्यक भौतिक पूर्वाधार, पाहुनाको स्वागत सत्कार, अर्गानिक खानपान, सरसफाइबारे छलफलहरु समेत गरिने छ । गाउँपालिका प्रमुख प्रशासकीय अधिकृत हेमराज काफ्लेले होमस्टेलाई व्यवस्थित, आवश्यक पूर्वाधार, सञ्चालन, तालिम, व्यवस्थापनमा मागाउँपालिका तयार रहेको बताए ।
