बागलुङ/दशैं, तिहार लगायतका चाडपर्वका बेला बजारमा झिनियाको माग र खपत बढ्छ । अन्य समयमाभन्दा रंग मिसिएका अन्य खाद्य सामग्री यो बेला बढी नै प्रयोगमा आउँछन् ।
अखाद्य रंग प्रयोग गरिएका खानाबाट दिर्घकालिन रुपमा प्राणघातक रोगकोसमेत संक्रमण हुने सचेतनासहित बागलुङ बजारमा धामधाम बजार अनुगमन थालिएको छ । बागलुङ नगरपालिकाको संयोजनका अनुगमनमा निस्किएको सरोकारवालाको समुहले बजारका खद्यान्न, माछा, मासु, फलफुल तथा सरकारी पसलहरुमा पुगेर अनुगमन थालेको हो ।
अनुगमनका क्रममा उपभोक्ता हितको ख्याल गर्न, राज्यका नियम कानूनको पालना गरेर मात्रै दैनिक उपभोग्य बस्तुको खरिद बिक्रि गर्न आग्रह गरिएको उपभोक्ता मञ्चका अध्यक्ष शैलेन्द्रकुमार श्रेष्ठले बताए ।
बिहिबार गरिएको अनुगमनमा मासुु पसलमा मासु फोहोर भेटिएको, पसलहरुमा अखद रंग मिसिएका झिलिङ्गालगायतका खाद्यसामग्री भेटिएको बागलुङ नगरपालिकाका राजश्व शाखा बधिकृत सरस्वती शर्माले बताईन् ।
