जोमसोम / मुस्ताङको थासाङ गाउँपालिका-१ टुकुचे हिमालको ‘हिडन भ्याली’ मा हिउँमा फसेका ३ जना विदेशी महिलासहित १५ जनालाई उद्धार गर्न सुरु गरिएको छ । उनीहरुको उद्धारका लागि नेपाली सेना, सशस्त्र प्रहरी र नेपाल प्रहरीको संयुक्त टोली खटिएको छ । नेपाली सेनाको उच्च शिखर शिक्षालय, इन्द्रबक्स गण, नेपाल प्रहरी र सशस्त्र प्रहरीको १० जनाको टोली ‘हिडन भ्याली’ तर्फ प्रस्थान गरेको छ ।
म्याग्दीकोे मुदीहुँदै राउन्ड धौलागिरी फन्को मारेर मुस्ताङ मार्फा फर्किदै गरेका ३ जना ब्रिटिस महिला पर्यटकसहित १५ जना ‘हिडन भ्याली’मा अलपत्र परेका हुन । पर्यटक अलपत्र परेको समाचार आएलगतै जिल्ला सुरक्षा समितिको बैठक बसेर टोली परिचालन गरिएको मुस्ताङका प्रमुख जिल्ला अधिकारी (प्रजिअ) विष्णुप्रसाद भुषालले बताए । बाक्लो हिमपातले पदमार्ग पुरिएको अवस्थामा पर्यटकलाई यात्रा गर्न समस्या हुने भएकाले हिउँ पन्छाउने उपकरणसहित टोली खटाइएको छ ।
काठमाडौंको सेक्रेट हिमालय ट्रेड एण्ड एक्स्पिडिसन ट्राभल एजेन्सीबाट ट्रेकिंगमा गएका तीन बेलायती महिला पर्यटकसहितको यो टोली सोमबारदेखि हिउँमा फसेको थियो । १५ जनाको टोलीमा ब्रिटिस नागरिकहरु Ms Mary Reape, Ms Catherine Wilson र Ms Emily Coats सहित उनीहरुको सहयोगका लागि गएका १२ जना नेपाली रहेका छन् ।
संसारको सातौँ अग्लो धौलागिरि हिमालको आधार क्षेत्र हुँदै मुस्ताङ प्रवेश गरेका उनीहरु हिमपातका कारण बिच बाटोमा नै अलपत्र परेका थिए । प्रजिअ भुषालले बुधबार मौसम केही अनुकूल भएकाले माथिल्लो क्षेत्रबाट पर्यटकहरू झर्दै गरेको र तलबाट थप सहयोगका लागि उद्धार टोली पठाएको बताए ।
प्रजिअ भुषालका अनुसार, पर्यटकहरूसँग पर्याप्त खानेकुरा छ । भुषालले उद्धार टोलीलाई पैदलमा त्यहाँ पुग्न दुई दिन लाग्ने जानकारी दिए । सडकबाट उद्धारको टोली प्रस्थान गरेको र हेलिकप्टरबाट समेत सम्भव भएसम्म उद्धार गरिने प्रजिअ भुषालले बताए ।
