पाेखरा / कास्की बचत तथा ऋण सहकारी संघ लिमिटेडले आफ्नो २५ औँ स्थापना दिवस आइतबार पोखरामा खुल्ला रक्तदान कार्यक्रम गरी मनाएको छ । कास्कीका बचत तथा ऋण सहकारी संस्थाहरुको संघले आफ्नो सामाजिक उत्तरदायित्वअन्तर्गत गरिएको उक्त कार्यक्रममा ३६ यूनिट रगत संकलन भएको थियो ।
कार्यक्रममा प्रमुख अतिथि गण्डकी प्रदेश, सहकारी रजिष्ट्रार कार्यालयका रजिष्ट्रार भेषराज रिजालले सहकारी संस्थामार्फत् हुने सामाजिक उत्तरदायित्व अन्तर्गतका कार्यक्रमले समुदाय लाभान्वित भइरहेको बताए । उनले सहकारी भनेको पैसा लिने र ऋण दिने मात्र कार्य भएको भन्ने बुझाइ रहेको र यसलाई चिर्न पनि सहकारीको सिद्धान्त अनुरुप समुदाय लक्षित कामहरु गर्दै अगाडी बढ्नु पर्ने समय आएको बताए ।
नेफ्स्कुनका सञ्चालक कमला गिरीले सहकारी नियमन प्राधिकरणमार्फत् सहकारी संस्थाहरुको नियमन प्रक्रिया र कर्जा सूचना केन्द्रमा दर्ता प्रक्रिया अगाडी बढ्नु स्वागत योग्य रहेको भनाइ राखिन्। केही सहकारी संस्थाका अनैतिक क्रियाकलापले असल अभ्यासमा रहेका सहकारीलाई पनि एउटै डालोमा हालेर सहकारीको क्षेत्रलाई सिमित घेरामा राख्न खोजेको हो कि भन्ने शंका उत्पन्न भएको छ भन्दै सञ्चालक गिरीले नियमन मार्फत् यसको क्षेत्रलाई व्यापक बनाएर सहकारी मार्फत समृद्धिमा जोड दिनु नै सहकारी संघको माग रहेको बताइन् ।
कार्यक्रममा जिल्ला सहकारी संघ लिमिटेडका निवर्तमान अध्यक्ष सावित्री कोइराला, हितैषी सहकारीका अध्यक्ष मदनप्रसाद आचार्य, शिवालय टोल विकास संस्थाका अध्यक्ष मिना ढकाल, शिवालय आमा समूहका अध्यक्ष कल्पना सिग्देलले शुभकामना मन्तव्य राखेका थिए । संघका अध्यक्ष शेरबहादुर कार्कीको अध्यक्षतामा भएको कार्यक्रमको स्वागत मन्तव्य कार्यक्रम संयोजक उपाध्यक्ष ईश्वरप्रसाद सुबेदीले राखेका थिए भने सञ्चालन सचिव मिनराज तिमिल्सिना गरेका थिए । संघमा कास्की जिल्ला भित्रका ३०३ वटा बचत तथा ऋण सहकारी संस्था सदस्य रहेका छन् ।
