पोखरा/पोखरा २१, दोपहरे हर्राबोटमा सुन्तला महोत्सव आयोजना गरिएको छ । नेपालको राष्ट्रिय फल सुन्तलाको उपभोग, स्थानीय उत्पादन, पर्यटन र अर्थतन्त्रमा सहयोग भन्ने नाराका साथ पोखरा महानगरपालिका आर्थिक विकास महाशाखा, वडा नं.२१ को कार्यालय र वडास्तरीय कृषि सञ्जालको आयोजनामा महोत्सव भएको हो ।
पोखरा महानगरपालिकाको एक वडा–एक उत्पादन कार्यक्रमअन्तर्गत सुन्तला पकेट क्षेत्रका रूपमा स्थापित वडा नं. २१ का किसानहरूलाई लक्षित गर्दै महोत्सव आयोजना गरिएको पोखराका मेयर धनराज आचार्यले जानकारी दिए । महोत्सवमा किसानहरूले आफ्नै बगैंचामा उत्पादन गरेका अर्गानिक सुन्तलाहरू एकै थलोमा बिक्री गर्न पाउने व्यवस्था मिलाइएको छ ।
यस वर्ष पोखरा महानगर क्षेत्रभित्र करिब रु. १० करोडभन्दा बढीको सुन्तला उत्पादन भएको अनुमान गरिएको महानगरका आर्थिक महाशाखा प्रमुख मनोहर कडरियाले बताए ।
