काठमाडौं/ संस्कृति, पर्यटन तथा नागरिक उड्यनमन्त्री अनिलकुमार सिन्हाले चाहेर पनि पोखरा र भैरहवा विमानस्थललाई सञ्चालनमा ल्याउन नसकेको स्विकारेका छनु । विहीबार आयोजित बिदाइ कार्यक्रममा उनले पोखरा अन्तर्राष्ट्रिय विमानस्थल र भैरहवाको गौतम बुद्ध अन्तर्राष्ट्रिय विमानस्थललाई प्रभावकारी रूपमा सञ्चालनमा ल्याउन नसकिएको बताएका हुन् ।
पर्यटन मन्त्रालय आफूले सम्हाल्दै गर्दा अत्यन्त अव्यवस्थित पाएको र ठूला पूर्वाधार निर्माण भएपनि तिनलाई सञ्चालन गर्ने स्पष्ट र कार्यान्वयनयोग्य योजनाको अभाव रहेको उनले बताए । आफू मन्त्री भएपछि पोखरा र भैरहवा विमानस्थल सञ्चालनको लागि कार्ययोजना र सुझाव तयार पारिएको उनको भनाई छ।
मन्त्री सिन्हाले पोखरा र भैरहवा विमानस्थल चलाउनका लागि केही कार्ययोजना बनाएको, सुझावदहरु दिएको तर ठोसरुपमा काम अगाडि बढाउन भने नसकेको बताए । कार्ययोजना बनाएपनि निर्वाचनको कारण ठोस रूपमा कार्यान्वयनमा ल्याउन नसकेको उनले उल्लेख गरे। उनले युरोपियन युनियनको कालोसूचिमा रहेको नेपालको हवाई क्षेत्रलाई कालोसूचिबाट हटाउन आवश्यक सुधारको काम थालिएको पनि जानकारी दिए।
