बागलुङ/धौलागिरी एकीकृत ग्रामिण विकास केन्द्र (डिआइआरडिसी) को आयोजना र बागलुङ नगरपालिका वडा नं. १ को कार्यालयको सहकार्यमा ३ तीने दुना टपरी बनाउने तालिम सम्पन्न भएको छ ।
स्थानीय बजारमा उच्च माग रहेको प्रविधिमा आधारित दुना टपरी बनाउन सिपको अभाव रहेको भन्दै वडा कार्यालयबाट माग आएपछि डिआइआरडिसीले ओएनजिडी एफएलइएलको आर्थिक सहयोगमा तालिम सञ्चालन गरेको हो ।
२१ जना महिला सहभागि रहेको तालिममा उद्यमशिल दुना टपरी उद्योगले प्राविधिक सहयोग गरेको थियो । तालिमपछि जंगलमा खेर गइरहेका सालका पात संकलन गरी दुना टपरी बनाएर महिला आयआर्जनमा जोडिने डिआइआरडिसीले अपेक्षा गरेको छ ।
तालिम समापनमा बोल्दै वडा अध्यक्ष जय बहादुर केसीले महिलालाई आत्मनिर्भर बनाउन दुना टपरी बनाउने सिपले सहयोग पुग्ने बताए । पछिल्लो समय स्थानीय स्तरमा उत्पादित दुना टपरीको माग उच्च रहेको चर्चा गर्दै त्यसका लागि आधुनिक मेशिन समेत वडामा भित्राएको जानकारी दिए ।
धौलागिरी एकीकृत ग्रामिण विकास केन्द्रका अध्यक्ष केवि राना मगरको अध्यक्षतामा सम्पन्न भएको कार्यक्रमको सञ्चालन चन्द्र थापाले गरेकी थिइन् ।
