बगलुङ/सरकारी विज्ञापन निजी संचार माध्यमलाई नदिने सरकारी निर्णयविरुद्द नेपाल पत्रकार महासंघले चरणबद्व आन्दोलन थालेको छ ।
केही दिनअघि हस्ताक्षर संकलन गरेर प्रधानमन्त्री कार्यालयमा पठाइएकोमा शुक्रबार जिल्ला प्रशासन कार्यालय बागलुङमा धर्ना दिने कार्यक्रम गरिएको छ ।
केन्द्रीय कार्यक्रम अनुसार बागलुङ शाखाले विभिन्न संचार माध्यमका सञ्चालकको उपस्थितिमा प्रशासनमा एकघण्टे धर्ना कार्यक्रम गरेको हो । उक्त अवसरमा महासंघका अध्यक्ष राम थापा ‘अविरल’ले महासंघको देशव्यापी कार्यक्रमअन्तर्गत धर्ना दिइएको बताए ।
सरकारले सरकारी विज्ञापनमा आम संचार माध्यममा रोक लगाएको छ । गोराखापत्रमा मात्रै विज्ञापन छाप्ने नीतिले निजी संचार माध्यम तथा सामुदायिक संचार माध्यमहरु धरासायी बनेका छन् । राज्यले समान विज्ञापन नीति लिनुपर्नेमा विभेदकारी नीति लिएको भन्दै महासंघले उक्त निर्णय फिर्ताका लागि सरकारलाई दबाब दिएको हो ।
सरकारी नीतिमा परिवर्तन नभएमा महासंघले थप आन्दोलनका कार्यक्रम गर्ने चेतावनी दिंदै आएको छ । सरकारी विभेदकारी नीतिविरुद्व महासंघले कालो व्यानर राख्ने, सम्पादकीय मार्फत सरकारको नीतिको विरोध गर्ने लगायतका काम पनि गर्दै आएको छ ।
