पोखरा / गण्डकी प्रदेश सभामा आगामी आर्थिक वर्ष २०८३/०८४ को वार्षिक बजेटमाथिको छलफलमा एमाले सांसद भक्तबहादुर कुँवरले विगतको तुलनामा यो बजेट केही सबल र फराकिलो भएर आएको टिप्पणी गरेका छन् । यद्यपि, बजेट खर्च गर्ने परम्परागत प्रवृत्तिका कारण लक्ष्य हासिल गर्न कतै समस्या हुने त होइन भन्ने आशंका भने कायमै रहेको उनले बताए ।

‘हामीले एउटा आर्थिक वर्षलाई मात्र हेरेर बजेट विनियोजन गर्दै आएका छौँ, तर विगतको खर्च गर्ने शैली हेर्दा लक्ष्यमा पुग्न सकिँदैन कि भन्ने आशंका उब्जाउँछ,’ सांसद कुँवरले भने, ‘बजेटको प्राविधिक शब्द र आँकडामा केही कमजोरीहरू अवश्य छन् । अर्थ मन्त्रालयबाट वर्षेनी यस्ता कमी–कमजोरी दोहोरिने गरेकाले कतिपयले आशंका व्यक्त गर्नु स्वाभाविक हो । यसमा कर्मचारी संयन्त्रले बढी चासो र जिम्मेवारी देखाउनुपर्छ ।’

चालु खर्च घटाएर पूँजीगत (विकास) खर्चको हिस्सा बढाउनु बजेटको राम्रो पक्ष भएको उनले उल्लेख गरे । ‘सरकार मितव्ययिता, चुस्त–दुरुस्त, छिटो–छरितो र सुशासनको बाटोमा अघि बढेकाले नै चालु भन्दा पूँजीगत खर्च बढी भएको हो, यो वित्तीय अनुशासनको उत्कृष्ट उदाहरण हो,’ उनले थपे ।

राजस्व सुधारका लागि बजेटले ल्याएका नीतिहरूको प्रशंसा गर्दै उनले कर सहभागिता बढाउन अनलाइन भुक्तानी, करको दायरा परिमार्जन, शुल्क र वस्तुको वैज्ञानिक निर्धारण तथा कार्यविधि बनाएर राजस्व संकलनमा एकरूपता ल्याउन र प्रदेशमा छुट्टै राजस्व कार्यालय स्थापना गरेर कर प्रणालीलाई व्यवस्थित बनाउन बजेटले पहल गरेको जनाए । विगतको तुलनामा आन्तरिक राजस्व वृद्धि हुँदै गएकाले आगामी वर्ष गण्डकीको आन्तरिक राजस्व ५ अर्ब रुपैयाँ पुग्ने विश्वास उनले व्यक्त गरे ।

बाँदर नियन्त्रणका लागि ‘खानयोग्य वृक्षारोपण’को प्रस्ताव
बजेटले कृषिलाई प्राथमिकतामा राखेर थुप्रै कार्यक्रमहरू ल्याएको भन्दै सांसद कुँवरले खुसी व्यक्त गरे । सरकारको ‘घर फर्क अभियान’ (रिटर्न टु भिलेज) लाई बजेटले पूर्ण रूपमा समेट्ने विश्वास व्यक्त गर्दै उनले पर्वतको ‘बासखर्कको सुन्तला’लाई पनि बजेटले विशेष सम्बोधन गर्नुपर्ने माग गरे ।

‘सरकारले ’रैथाने बाली रोपौँ, स्वास्थ्य र पर्यावरण बचाऔँ’ भन्ने नारा ल्याएको छ, यो राम्रो छ । अब रैथाने बालीलाई कसरी आधुनिक र हाइब्रिड (परिमार्जित) बनाएर उत्पादन बढाउने भन्नेतर्फ लाग्नुपर्छ,’ कृषि क्षेत्रबारे सुझाव दिँदै उनले भने, ‘अहिले कृषकहरू बाँदर र वन्यजन्तुको आतंकबाट आजित छन्, त्यसैले वन क्षेत्रमा बाँदर र अन्य वन्यजन्तुका लागि ‘खानयोग्य वृक्षारोपण’ गर्ने कार्यक्रम पनि तत्काल सुरु गर्नुपर्छ ।’

बजेट जतिसुकै राम्रो र आकर्षक भए पनि कागजमा मात्र सीमित हुन नहुने उनको तर्क थियो । ‘बजेट बनाउने, लेख्ने र कागज भर्ने कुरा मात्र प्रधान होइन,’ उनले भने, ‘जनताले आफ्नो दैनिक जीवनमा रूपान्तरण र परिवर्तनको अनुभूति गर्ने गरी बजेटले तल्लो तहलाई छुनुपर्छ, अनि मात्र बजेट सफल