बागलुङ/खाना पकाउने एलपी ग्यास वितरणलाई व्यवस्थित र पारदर्शी बनाउन बागलुङ बजारमा ‘उपभोक्ता कार्ड’ प्रणाली लागू गरिएको छ ।

बजारमा पर्याप्त ग्यास आपूर्ति भएपनि उपभोक्ताले धेरैभन्दा धेरै ग्यास सञ्चय गर्न थालेपछि एलपी ग्यास विक्रेता संघले ‘उपभोक्ता कार्ड’ अनिवार्य गरेको हो । ‘उपभोक्ता कार्ड’ले ग्यास वितरण सहज हुने र दोहोरोपनाको समस्या हट्ने विक्रेता संघको अपेक्षा छ ।

संघले आधिकारिक विक्रेता फर्म, उपभोक्ताको नाम, सम्पर्क नम्बर, ठेगाना, उपभोक्ताको नागरिकता नम्बर, घरधनी र विद्यार्थी भए संस्थाको नाम उल्लेख गरिएको ‘उपभोक्ता कार्ड’ प्रणाली लागू गरेको ग्यास विक्रेता संघका सदस्य गणेशराज लम्सालले जानकारी दिए ।

‘‘उपभोक्ता कार्डले परिवार संख्याको तथ्यांक देखाउने छ, एक घरसंग एउटा कार्ड हुँदा ग्यास वितरणमा दोहोपन हटी सहज हुनेछ’’ लम्सालले भने । संघले जिल्ला प्रशासन कार्यालयको समन्वयमा ‘उपभोक्ता कार्ड’ प्रणाली लागू गरेको हो ।

दैनिक साढे ३ सय र मासिक ९ हजार ग्यास सिलिण्डर खपत हुने बागलुङमा साउन यता १४ हजार ७ सय ९० थाना ग्यास वितरण भइसकेको छ । अघिल्ला महिनाभन्दा ५ हजारबढी ग्यास वितरण भएपनि अभाव हुने हल्लाले डिलरमा ग्राहकको भीड लाग्ने गरेको छ । बिहीबार मात्रै बागलुङमा ९ सय ७० थान ग्यास सिलिन्डर वितरण गरिएको छ ।

एलपी ग्यासको कृत्रिम अभाव रोक्न स्थानीय प्रशासन, जनप्रतिनिधि र सरोकारवाला निकाय निकाय सक्रिय भएका छन् । सर्वसाधारणले सहज रूपमा ग्यास नपाएको गुनासो आएपछि प्रहरी, प्रशासन, उद्योग वाणिज्य संघ, नगरपालिका, उपभोक्ता मञ्च र ग्यास बिक्रेता संघको सहकार्यमा ग्यास बिक्री वितरणलाई सहज बनाउने प्रयास भएको हो ।

आगामी दिनमा ग्यास नजिकको आधिकारिक बिक्रेताबाट उपलव्ध गराउने भएकाले ग्यास आए–नआएको विषयमा बिक्रेतासंग सम्पर्क गर्न र अनावश्यक हल्लाको पछाडि लागि लाइनमा नबस्न सर्वसाधारण उपभोक्तालाई सरोकारवालाले अनुरोध गरेका छन् ।

ग्यासको अनावश्यक सञ्चय गर्न नदिन प्रभावकारी अनुगमन गर्ने, कहिकतै विक्रेताले बढी मुल्य लिएको पाईएमा तत्काल प्रशासनमा खबर गर्न अनुरोध गरिएको छ । ग्यासको अवस्थाबारे अनुगमन गर्न टोली परिचालन भएकोले अनावश्यक रुपमा ग्यास सञ्चय गरेको पाइएमा कारबाही गरिने प्रमुख जिल्ला अधिकारी कृष्ण प्रसाद आचार्यले बताए ।