बागलुङ / सरकारले गृह मन्त्रालयको सचिवको जिम्मेवारी केदारनाथ शर्मालाई दिएको छ। बिहीबार बसेको मन्त्रिपरिषद् बैठकले रक्षा मन्त्रालयका सचिव शर्मालाई गृह मन्त्रालयमा सरुवा गर्दै गृह सचिवको जिम्मेवारी दिएको हो। बागलुङ घर भएका शर्मालाई विपद्को समयमा गृह सचिवको जिम्मेवारी आईपरेको छ ।
गृह मन्त्रालय देशको शान्ति सुरक्षा, विपद् व्यवस्थापन, अध्यागमन, नागरिकता तथा स्थानीय प्रशासनसँग प्रत्यक्ष सरोकार राख्ने महत्वपूर्ण मन्त्रालय भएकाले सचिव शर्मासामु सुरक्षा व्यवस्थापन, सेवा प्रवाहलाई प्रभावकारी बनाउने तथा प्रशासनिक सुधारलाई गति दिने चुनौती र जिम्मेवारी रहने छ।
लामो प्रशासनिक अनुभव भएका शर्माले यसअघि विभिन्न मन्त्रालय तथा सरकारी निकायमा महत्वपूर्ण जिम्मेवारी सम्हालिसकेका छन्। विपद्को समयमा भएको उनको सरुवासँगै गृह प्रशासनलाई थप प्रभावकारी र परिणाममुखी बनाउने अपेक्षा गरिएको छ।
हालका गृह सचिव राजकुमार श्रेष्ठ अनिवार्य अवकाशमा जान केही दिन मात्र बाँकी रहेका बेला उनले दिएको राजीनामा मन्त्रिपरिषद्ले स्वीकृत गरेको हो । श्रेष्ठ तीन दिनपछि अनिवार्य अवकाशमा जाने तयारीमा थिए।
