पोखरा / हिमालपारीको उपल्लो मुस्ताङको लोमन्थाङ गाउँपालिका केन्द्रबिन्दु भएर गएको भूकम्पले त्यस क्षेत्रका केही घरहरु चर्किएका छन् । एउटा घर भत्किएको छ भने एउटा गुम्बाको पर्खाल पनि भत्किएको छ ।
मंगलबार राती ९ बजेर ४३ मिनेटको समयमा लोमान्थाङ आसपास केन्द्रबिन्दु भएर ५.३ रेक्टर स्केलको भूकम्प गएको थियो । लोमान्थाङ गाउँपालिकाका अध्यक्ष टसी न्हर्वु गुरुङका अनुसार भूकम्पका कारण गाउँपालिकाका १, २, ३ र ४ नम्बर वडामा क्षति पुराएको छ । वडा ३ का कर्साङ गुरुङको घर भत्किएको छ । यसैगरी नामगेल गुम्बाको पर्खाल भत्किएको उनले बताए ।
‘माटोको घर भएकाले अधिकांश चर्किएका छन, यसले उनीहरुलाई अन्यत्र सानुपर्ने अवस्था देखिन्छ्’, अध्यक्ष गुरुङले भने, ‘क्षतिको विवरण संकलन भइरहेको छ ।’ क्षतिको विवरण संकलनका लागि जनप्रतिनिधि, नेपाल प्रहरी, सशस्त्र प्रहरी र अन्नपूर्ण संरक्षण क्षेत्र आयोजना (एक्याप) सहितको टोली परिचालन गरिएको छ ।
मुस्ताङ प्रहरी प्रमुख डिएसपी रामचन्द्र तिवारीले एउटा कच्ची घर गुम्बाको वालमा क्षति भएको सूचना आएको बताए । उनले पनि क्षतिको विवरण संकलन भइरहेको जनाए ।
