पोखरा/विश्वका १ सय २० भन्दा बढी गन्तव्यमा पुगेको दुबईको ‘फ्लाइ दुबई’ले अब पोखरामा पनि उडान भर्दै छ । पोखरा अन्तर्राष्ट्रिय विमानस्थलबाट अब सोझै दुबई पुग्न सकिनेछ भने दुबईबाटसोझै पोखरा आउन सकिनेछ ।

फ्लाइ दुबईले असोज ७ देखि नियमित उडान गर्न पोखरामा कार्यालय स्थापनासमेत गरिसकेको छ । पोखरा आउने जहाज १ सय ६६ सिट क्षमताको बोइङ ७३७ म्याक्स ८ मोडलको हो ।

विदेशमा रहेका कस्केलीको संस्था कास्की आदर्श समाज अन्तर्राष्ट्रिय समन्वय परिषद्ले गत वर्षको भदौमा दुबईमा पहिलो अन्तर्राष्ट्रिय कास्की सम्मेलन आयोजना गरेको थियो । पोखराबाट सम्मेलनमा सहभागी हुने उद्योगी, व्यवसायीको टोलीले फ्लाई दुबइको जहाज ‘चार्टर’ गरी पोखराबाट सिधै जान चाहे पनि सम्भव भएको थिएन ।

भदौकै पहिलो साता होटल संघ पोखराको नेतृत्वमा पर्यटन व्यवसायी र नेपालका लागि युएईका राजदूत अब्दुल्लाह साइद मुवारक जरवान अलशाम्सीबीच भेट भयो । संघले विभिन्न सम्भावना देखउँदै पोखरा–दुबइ उडानका लागि पहल गरिदिन आग्रह ग¥यो ।

फ्लाई दुबइका प्रतिनिधिले पोखरा विमानस्थलमा सरकारले दिने सुविधा खोजेपछि विभिन्न चरणमा पोखरा आएर व्यवसायी र महानगर प्रमुखसँग भेटसमेत गरे । त्यसपछि दैनिक नियमित उडान भर्ने गरी २८ जेठबाट टिकट बुकिङ खुला गरियो । असोज ७ गते साँझ ६ः१५ बजे पोखरा अन्तर्राष्ट्रिय विमानस्थलमा पहिलो जहाज अवतरण गर्ने तालिका छ । सोही दिन सवा ७ बजे जहाज दुबई फर्किनेछ ।

दुबई–पोखरा–दुबई रुटका लागि गत २५ जेठमा नागरिक उड्डयन प्राधिकरणले फ्लाई दुबईलाई अनुमति दिएको थियो । उडानलाई प्रोत्साहन दिन ६ साउनमा मन्त्रिपरिषद्ले ल्यान्डिङ, पार्किङ र नेभिगेसन शुल्कमा आगामी भदौ ०८५ सम्म शतप्रतिशत छुट दिने निर्णय गरिसकेको छ भने नेपाल एयरलाइन्सले पनि ग्राउन्ड ह्यान्डलिङ सेवामा सोही अवधिसम्म ५० प्रतिशत छुट दिने निर्णय गरिसकेको पोखरा अन्तर्राष्ट्रिय विमानस्थलका प्रमुख जगन्नाथ निरौलाले जानकारी दिए ।

फ्लाइ दुवईले सन् २००९ देखि नेपालमा सेवा सुरु गरेको थियो । यसले हालसम्म करिब ४० लाख यात्रुलाई सेवा दिइसकेको छ भने पिक सिजनमा काठमाडौंमा दैनिक ५ उडानसम्म सञ्चालन गर्दै आएको छ ।

दुबईबाट पोखरा र पोखराबाट दुबई उडान काठमाडौंबाट भन्दा पाँच हजार सस्तो पर्ने फ्लाई दुबईका नेपालस्थित जेनेरल म्यानेजर नवराज शाहीले जानकारी दिए । ‘फ्लाइ दुबईका आफ्नै १ सय २० भन्दा बढी गन्तव्यमा उडान छन् । इमिरेट्ससँगको कोडसेयरका कारण सबै मिलाएर २ सय ५० गन्तव्यसम्म पुगिन्छ । अरू ३० वटा एयरलाइन्ससँग पनि इन्टरलाइन सम्झौता छ,’ शाहीले भने, ‘अहिले दुई महिना भइसक्यो । फ्लाई दुबईका १ सय २० गन्तव्यमध्ये अत्यधिक चल्ने १५–२० रुटमा काठमाडौंभन्दा पोखराबाट कम्तीमा पनि पाँच हजार रूपैयाँ सस्तो छ ।’

पोखराबाट सुरु हुने उडान चार्टर्ड नभई नियमित उडान भएकाले यात्रु संख्या कम भए पनि उडान रद्द नगर्ने कम्पनीको नीति छ । पोखर पर्यटन परिषद् अध्यक्ष हरि भुजेल दुबईलाई केवल अन्तिम गन्तव्यका रूपमा मात्र नहेरी ‘ट्रान्जिट हब’का रूपमा प्रयोग गर्न सकिने बताउँछन् ।

त्यहाँबाट अब युरोप, मध्यपूर्व, अफ्रिका लगायतका विभिन्न गन्तव्यमा यात्रु पठाउन सकिने भएकाले यसको बजार सम्भावना निकै ठूलो हुने उनले सुनाए । नाट्टाका पूर्व अध्यक्ष पोमनारायण श्रेष्ठ पोखराबाट फ्लाई दुबई सञ्चालनमा आउनु एयरलाइन्सको उडान सुरु हुनुमात्र नभई यसले बहुअर्थ बोकेको बताउँछन् ।