पर्यटकीय सम्भावना बोकेको क्षेत्र हो बागलुङ नगरपालिका–१० को भकुण्डे। सदरमुकामबाट करिब १५ किलोमिटर दूरीमा अवस्थित यो बस्ती समुद्री सतहदेखि करिब २१०० मिटर उचाइसम्म फैलिएको छ। यहाँबाट धौलागिरि, अन्नपूर्ण, माछापुच्छ्रे, निलगिरी र मनास्लु हिमालको मनोरम दृश्य अवलोकन गर्न सकिन्छ । बराह ताल, भ्यु–पोइन्ट र होमस्टेले भकुण्डेलाई विशिष्ट पहिचान दिएको छ। तर यति धेरै सम्भावनाबीच पनि समग्र नेतृत्वलाई जिस्काइरहेको छ जीर्ण सडकले ।

२२ वर्षअघि खुलेको सडकको ट्रयाक अझैसम्म स्तरोन्नति हुन नसक्दा स्थानीयले दैनिक जीवनयापनमै सास्ती खेप्न बाध्य छन् । कृषि उपज बजार पु¥याउन कठिन, दैनिक उपभोग्य सामग्री ल्याउन समस्या, बिरामी बोक्न गाह्रो – यी सामान्य समस्या भकुण्डेमा असामान्य बनेका छन् । सदरमुकाम नजिक भएर पनि पूर्वाधारको अभावले गाउँ टाढा परेको अनुभूति हुन्छ ।

भकुण्डे पशुपालन, कोदो, मकै, तरकारी उत्पादनमा अब्बल क्षेत्र हो । यहाँका किसान उत्पादन गर्न तयार छन्, होमस्टे सञ्चालक पर्यटक भित्र्याउन उत्साहित छन् । तर सडकको अवस्थाले पाहुना फर्किएका उदाहरण बढ्दै गएका छन्। ’सडककै कारण आउन नसक्ने’ भन्ने गुनासो पर्यटन व्यवसायीले बारम्बार सुन्नुपरेको छ । वार्षिक ३० हजारसम्म आन्तरिक तथा बाह्य पर्यटक पुग्ने क्षेत्रले अझ दोब्बर सम्भावना बोकेको छ, तर पहुँच अभावले त्यसलाई रोकेको छ ।

यहाँ आउने पर्यटकले पदयात्रामा स्थानीय संस्कृति, ग्रामीण जीवनको अनुभव पाउने गरेका छन्। कोरिया, अमेरिका, चीन, युरोपलगायत मुलुकका पर्यटकले भकुण्डे–रायडाँडा–बौरसम्मको पदयात्रा रुचाउने गरेका छन् । तर स्तरीय पदमार्गको अभावले लामो बसाइ र पुनः आगमनको सम्भावना कमजोर बनिरहेको छ ।

स्थानीय जनप्रतिनिधि स्वयं स्वीकार्छन्, सडक सहज नभएसम्म अन्य विकासका कामले जनतालाई विश्वस्त पार्न सक्दैन भनेर। नगरस्तरको बजेट पर्याप्त छैन, प्रदेश र संघीय योजनाका ठेक्का अलपत्र छन् । यही प्रशासनिक ढिलासुस्ती र समन्वय अभावले विकासको गति सुस्ताएको छ ।

समयमा सडक नबन्दा पर्यटकीय गन्तव्य ओझेलमा परेको छँदैछ, त्यहाँको खानेपानी, सिंचाइ, शिक्षा र स्वास्थ्य सेवा पहुँचभन्दा टाढा हुँदा बसाइसराइ बढ्न थालेको छ । उत्पादनलाई बजारसँग जोड्ने सडक बनेन भने युवालाई गाउँमै रोक्ने आधार कमजोर हुन्छ ।

भकुण्डेका नागरिक मेहनत गर्न तयार छन् । राज्यले अब स्तरीय सडक वा व्यवस्थित पदमार्गमध्ये कम्तीमा एक सुनिश्चित गर्नुपर्छ । पूर्वाधारमा लगानी बिना पर्यटन प्रवद्र्धन र कृषि आधुनिकीकरण सम्भव हुँदैन । सम्भावनाले भरिएको भकुण्डेलाई चुनावी भाषण होइन, आश्वासन होइन, सडक चाहिएको छ ।