नेपालमा क्यान्सर औषधिको अभाव भएको छ । किमियोथेरापीमा चलाउनुपर्ने जीवरक्षक औषधि ‘कार्बोप्लाटिन’ र ‘सिस्प्लाटिन’ को अभावले उपचार प्रभावित बनेको छ । आयातकर्ताले मूल्य समायोजना नभएसम्म यी नल्याउने अडान लिएपछि औषधिको अभाव भएको हो । औषधि व्यवस्था विभागले तोकेको मूल्य भारतमा भन्दा सस्तो भएको र त्यो मूल्यमा आयात सम्भव नभएको उनीहरुको जिकिर छ । औषधि व्यवस्था विभागले विभिन्न ११७ वटा औषधिको मूल्य तोकेको छ । बजारमा औषधिको अभाव देखिएपछि रोगीहरु मर्कामा परेका छन् । स्वास्थ्य मन्त्रालय तथा औषधि व्यवस्था विभागलाई बजारमा औषधि अभाव भएको जानकारी छ । विभागले आयातकर्तासँग एक चरण छलफल पनि गरेको थियो तर समस्या समाधान हुन सकेको छैन । जसले गर्दा क्यान्सरपीडितहरुले थप पीडा भोगिरहेका छन् । औषधिकै निम्ति भारतीय बजारसम्म पुग्नुपर्ने अवस्था आएको छ ।

तुलनात्मक रुपले सस्तो र प्रभावकारी औषधि अभाव भएपछि डाक्टरहरुले विकल्पमा अर्को औषधि चलाएका छन् तर ती औषधि महंगा र प्रभावका दृष्टिले पनि कमजोर रहेको उनीहरुको भनाइ छ । डाक्टरहरुले तत्काल औषधिको आपूर्तिको आग्रह गरे पनि सरकारले समस्या नसल्टिएको विभागकी निमित्त महानिर्देशक शिवानी खड्गीको भनाइ छ ।

औषधिको अभाव हुनु भनेको मान्छेलाई मृत्युको मुखमा धकेल्नु हो । औषधिजस्तो अत्यावश्यक बस्तुको किन आयात भएन भन्नेतर्फ राज्यले आँखा लगाउनैपर्छ । अत्यावश्यक औषधिको आपूर्ति सुनिश्चितताका लागि के गर्नुपर्ने हो,त्यो काम गर्नैपर्छ । मूल्य समायोजन आवश्यक हो भने तत्काल गरिनुपर्छ । व्यवसायीले आयातमा आनाकानी गरिरहेको अवस्थामा राज्यले नै आपूर्तिको चाँजोपाँजो मिलाउनु पर्छ । बजारमा लामो समयदेखि जीवनरक्षक औषधिको अभाव हुनु भनेको नागरिकलाई संविधानले सुनिश्चित गरेको स्वास्थ्य सेवाबाट बञ्चित गर्नुमात्र हैन, अपराध नै हो । अतः सरकार चुप लागेर नबसोस् । औषधिको तत्काल आपूर्ति होस् ।