घाँस र दाउरा गर्दा हात काटेको मनपर्छ,
घाउ बाँध्न कम्मरको पटुकी, फाटेको मनपर्छ।
काइयोले कोरी तोरीको तेल लगाई शिरमा,
घुग्रियको कपालमा चुल्ठी, बाटेको मनपर्छ।
असारे महिना छुपु र छुपू हिलोमा धान रोपी,
गीतहरू गाउँदै दुःख र सुख, साटेको मनपर्छ।
कम्मरमा पटुकी अनि शिरमा पगरी बाँधेर,
भागदौड गर्दै हिलोमा खेल्न, आँटेको मनपर्छ।
मलजल गरी पहेलपुर फाँटको धानलाई काटेर,
निनहरू बेर्दै खालोमा धान, झाँटेको मनपर्छ।
