स्याङ्जा, २७ मंसिर– वैकल्पिक बाटो पृथक पाइला सिर्जनात्मक अभियान २०७६ स्याङ्जाद्वारा हरेक पन्ध्र दिनको अन्तरालमा आयोजना गरिदै आइएको कविता केन्द्रित कार्यक्रम ‘कविताको कुरा’ को चौथो श्रृंखला शनिबार सम्पन्न भएको छ ।
स्याङ्जाली युवा साहित्यकार तथा साहित्यिक अभियन्ता मिलन समीरको निवास वालिङ–९ भुम्रेको छतमा अनौपचारिक रूपमा आयोजना गरिएको कार्यक्रमको पहिलो चरणमा ‘नयाँ कविताको कुरा’अन्तर्गत बसन्त खनाल, युवराज सुवेदी, शम्भु अर्याल, अनन्त अर्याल र मिलन समीरले पछिल्लो समयमा लेखिएको कविता वाचन गरेका थिए ।
दोस्रो चरणमा ‘मन परेको कविताको कुरा’अन्तर्गत बसन्त खनालले युवाकवि सरस्वती आचार्य सरु सुधाको ‘सुरेली’, युवराज सुवेदीले युवाकवि देवराज तिवारीको ‘चेतना’, मिलन समीरले लेखनाथ क्षेत्रीको ‘केटाकेटी’, शम्भु अर्यालले अनिता न्यौपानेको ‘करिना ! तिमी लामो कविता हौ’ र अनन्त अर्यालले भूपी शेरचनको ‘ए जून’ कविता वाचन गरेका थिए ।
यस्तै, तेस्रो चरणमा ‘कविता– कृतिको कुरा’अन्तर्गत अनिता न्यौपानेको कविता कृति ‘ फुलको विद्रोह’को बारेमा युवा समिक्षक मिलन समीरद्वारा समीक्षात्मक टिप्पणी प्रस्तुत गरिएको थियोे भने सरस्वती आचार्य, राजु मार्मिक, रुद्रप्रसाद न्यौपाने र अनन्त अर्यालद्वारा कार्यक्रमको सन्दर्भसंगै कार्यक्रममा वाचन गरिएका कविताहरुबारे समीक्षात्मक टिप्पणी समेत प्रस्तुत गरिएको थियोे ।