पोखरा/ पोखराका अग्रज कवि तेजनाथ घिमिरेको निधन भएको छ । शनिबार बिहान २ बजेर १२ मिनेटमा नदीपुरस्थिति आफ्नै निवासमा उनको निधन भएको हो ।
घिमिरे लामो समयदेखि उच्च रक्तचाप, मधुमेह तथा दम रोगबाट पीडित थिए । उनलाई अक्सिजन दिएर घरमै उपचार भइरहेकोमा ८३ वर्षको उमेरमा निधन भएको हो । उनका २ श्रीमती ५ छोरा, २ छोरी छन् । उनको शनिबार सेतीनदी किनार तुलसी घाटमा अन्त्येष्टि गरिएको छ । लामो समय शिक्षण पेशामा आवद्ध घिमिरेले हिमदूत पत्रिकामा पनि काम गरेका थिए ।
नेपाली कांग्रेस निकट शिक्षक संघ कास्कीको संस्थापक अध्यक्षसमेत रहेका घिमिरेका ३ वटा कविता संग्रह प्रकाशित छन् । घिमिरे पोखरेली युवा सांस्कृतिक परिवारका पूर्वअध्यक्ष समेत हुन् । पोखराको कन्या क्याम्पस स्थापनामा पनि उनको ठूलो योगदान रहेको छ ।
