दमौली / तिहार नजिकिँदै गर्दा तनहुँका व्यावसायिक फूल कृषकलाई उत्पादन बिक्री नहुने चिन्ताले पिरोलेको छ । उनीहरूमा मौसमी विपत्ले फूल बिगार्ने चिन्ता पनि थपिएको छ । चाडपर्वमा सयपत्री फूलको माग बढ्ने भए पनि किसानले उचित मूल्य पाउने निश्चित छैन ।
खेतबारीमा फूल उत्पादन गर्ने किसानले न्यून मूल्यमा बिक्री गर्नुपर्ने तर उपभोक्ताले बजारमा महँगोमा किन्नुपर्ने अवस्थाले उत्पादक र उपभोक्ताबिचको मूल्य अन्तर बढाएको छ । बजारसम्म किसानको पहुँच नहुँदा बिचका व्यापारीले बढी लाभ लिने अवस्था बनेको छ ।
तनहुँको म्याग्दे गाउँपालिका–४, छिम्लीश्वाराका महिलाले गरेको सामूहिक सयपत्री खेती यसको उदाहरण हो । चण्डेश्वरी फलफूल तथा तरकारी उत्पादक समूहमा आबद्ध २३ महिलाले १६ रोपनीमा सयपत्री लगाएका छन् । किसानले प्रतिकिलो तीन सय रुपियाँमा बिक्री गर्ने फूल बजारमा आठ सयदेखि एक हजार रुपियाँसम्ममा बिक्री हुने गरेको समूहकी अध्यक्ष जितमाया रानाले बताईन् ।
रानाले भनिन्, “हामी मेहनतले फूल उत्पादन गर्छौं तर बिक्री गर्ने बेलामा उचित मूल्य पाउँदैनौँ ।” बजारमा फूलको माग बढ्ने समय भए पनि बिक्रीको सुनिश्चित नहुँदा किसानलाई लगानी नउठ्नेसमेत चिन्ता छ ।
म्याग्दे गाउँपालिकाका अध्यक्ष श्रीप्रसाद श्रेष्ठले वडा नं. ४, ५ र ६ का किसान तथा समूहलाई फूल खेतीका लागि सहयोग गरिएको बताए । स्थानीय उत्पादनको बजार विस्तार गर्न गाउँपालिकाले आफ्ना कार्यक्रम तथा चाडपर्वमा स्थानीय फूलको प्रयोग बढाउने नीति लिएको छ ।
गत वर्षदेखि व्यावसायिक रूपमा फूल खेती सुरु गरेका महिलाले गाउँपालिकाको अनुदान र कृषि प्राविधिकको परामर्शमा काम गर्दै आएका छन् । आर्थिक विकास शाखा प्रमुख प्रदीप न्यौपानेले गाउँपालिकाले स्थानीय किसानलाई व्यावसायिक फूल खेतीमा प्रोत्साहन गर्न गएको तीन वर्षदेखि ७० प्रतिशत अनुदान उपलब्ध गराउँदै आएको बताए । पालिकाले फूल टिपेर चिस्यान केन्द्रमा राख्ने व्यवस्थासमेत गरिदिएको छ ।
