उद्घाटन भएको ६ महिनापछि पोखरा विमानस्थल अन्तर्राष्ट्रिय भएको पुष्टि भएको छ । चीनको छेन्दुबाट १२० जना यात्रु बोकेर आएको सिचुवान एयरलायन्सको विमानले विमानस्थलबाट सफल अवतरण गरेको हो । विमानस्थलको चालु अंग्रेजी वर्षको जनवरी १ मा उद्घाटन गरिएको थियो । चिनियाँ ऋण सहयोगमा निर्मित विमानस्थल संचालनमा आए पनि अन्तर्राष्ट्रिय उडान नहुँदा यसको औचित्यमाथि प्रश्न उठ्दै आइरहेको छ । पोखरामा भएको यो उडान नियमित भने हैन । चार्टर्ड उडान भरेको सिचुवान एयरलायन्सले नियमित उडान भर्ने/नभर्ने टुंगो छैन ।
भारतले थप हवाइ रुट एवं उडान अनुमति नदिँदा भारत उडानको लागि तयार भएका विमान कम्पनीहरु पनि चुप लागेर बसेका छन् । २८ अर्ब रुपैयाँ ऋणमा बनेको विमानस्थलबाट अन्तर्राष्ट्रिय उडान कुरेर बसेका पोखरेली नागरिकहरु निराश बनेको अवस्थामा भएको चार्टर्ड उडानले आशा त जगाएको छ तर निश्चिन्त बन्न सकिने अवस्था छैन । बरु विमानस्थल नचल्दा नेपाल ऋणको चंगुलमा मात्र फस्ने सम्भावना बढ्दो छ । यस्तो अवस्थामा चीनले एयरपोर्ट संचालनमा देखाएको चासोलाई सकारात्मक मान्नुपर्छ । नेपालको तर्फबाट मित्रराष्ट्र चीनलाई नियमित उडानको लागि मनाउनुपर्छ । चीनतर्फ नियमित उडान हुने हो भने त्यसले यहाँको पर्यटन प्रवद्र्धनमा महत्वपूर्ण भूमिकासमेत खेल्नेछ ।
