घटना भएको घर ।
विराटनगर / धनकुटा जिल्लाको धनकुटा नगरपालिका- १ निगालेमा एकै परिवारका तीन जना झुण्डिएको अवस्थामा मृत फेला परेका छन् ।
निगालेका स्थानीय टिकाराम गुरुङको परिवारका ३ जना झुन्डिएको अवस्थामा मृत फेला परेको जिल्ला प्रहरी कार्यालय धनकुटाले जनाएको छ ।
टिकाराम गुरुङ, उनकी श्रीमती ३६ वर्षीया भीमा र १० वर्षीय छोरा आयुष आज बिहान घरभित्रै मृत फेला परेको प्रहरीले जनाएको छ ।
‘बुवा, आमा र छोरा मृत भेटिएका छन्’, प्रहरीले भन्यो ‘के भएर यस्तो भयो अनुसन्धान भई रहेको छ ।’संखुवासभाको चैनपुरस्थित नुनढाकी स्थायी घर भएको गुरुङ परिवार करिब १२ वर्ष अघिदेखि निगालेका लाल श्रेष्ठको खाली घरमा बस्दै आएको थियो ।
ज्याला मजदुरी गर्दै आएका टिकारामको परिवारमा चार जना थिए । ६ वर्षीय छोरी आशिका बाहेक सबै जना मृत भेटिएका हुन् ।
