पोखरा, २२ वैशाख – गण्डकी प्रदेश नवनियुक्त प्रदेश प्रमुख सीता पौडेलले बुधबार पदभार ग्रहण गरेकी छन् । पदभार ग्रहण गर्दासाथ उनले गण्डकी प्रदेशसभाका सभामुखमा समस्या भएको वताएकी छिन् । पत्रकारहरुसंग संक्षिप्त कुरा गर्दै प्रदेश प्रमुख पौडेलले प्रदेशसभा स्थगित गर्नुको जिम्मेवारी सभामुखले लिनुपर्ने वताईन ।
‘सभामुखमा समस्या थियो, निकास निकाल्नु पर्यो ।’, प्रदेश प्रमुख पौडेलले भनिन्, ‘सभामुखले अनिश्चितकालका लागि बैठक स्थगित गर्नुको कारणबारे जानकारी लिने र आवश्यक कदम चालिनेछ ।’ सभामुखले अहिलेलाई बैठक स्थगित गरौ भनेर सल्लाह गरेको भए समस्या नआउने वताउदै पौडेलले भनिन्, ‘के कारणले त्यस्तो भएको हो, बुझ्ने र समस्या फुकाउन सहजीकरण गर्ने काम मेरो हुनेछ ।’
मुख्यमन्त्री पृथ्वी सुब्बा गुरुङविरुद्ध अविश्वास प्रस्तावमाथि छलफल गर्न वैशाख १३ गते प्रदेशसभाको विशेष अधिवेशन आह्वान गरिएको थियो । वैशाख १५ गते बसेको बैठकमा अविश्वास प्रस्तावमाथि मतदान गर्ने कार्यसूची थियो । तर, जनमोर्चाका सांसद खिमविक्रम शाही ‘वेपत्ता’ भएको उजुरी प्रदेशसभामा दर्ता भएपछि सभामुखको आदेशमा सचिवले वैठक अनिश्चित समयका लागि स्थगित गरेको सूचना टाँस गरेका थिए ।
प्रदेशसभामा मुख्यमन्त्री विरुद्धको अविश्वास प्रस्ताव ‘पेन्डिङ’मा रहेको अवस्थामा नै नेपाल सरकारले सोमवार प्रदेश प्रमुख अमिक शेरचनलाई हटाएर पौडेललाई नियुक्त गरेको थियो । पौडेलले सोही दिन साँझ राष्ट्रपति विद्यादेवी भण्डारीबाट सपथ लिएकी थिइन् ।
