पोखरा/ पोखरा महानगरपालिका– २१ का वडाध्यक्ष दीपक सुवेदीले स्थानीय भूपेन्द्र गिरीविरुद्व प्रहरीमा निवेदन दिएका छन् । सुवेदीले आफुलाई ज्यानै मार्ने गरी रड प्रहार गरिएकाले हदैसम्मको कारवाहीका माग गर्दै गिरीबिरुद्ध वडा प्रहरी कार्यालय बैदाममा आइतबार निवेदन दिएका हुन् ।
गिरीले सार्वजनिक जग्गा अतिक्रमण गरेर बनाएको संरचना हटाउन गएका बेला शनिवार वडाध्यक्ष सुवेदीलाई रड प्रहार गरेका थिए । वडाध्यक्षसंगै रहेका एकजना व्यक्तिले छेकेका कारण उक्त रडले सुवेदीलाई कुनै चोट भने लाग्न पाएन । ठूलो भूपेन्द्र भनेर चिनिने गिरीले सार्वजनिक जग्गा मिचेर ट्रस्ट बनाइरहेका थिए । त्यसलाई रोक्न आग्रह गर्दा अटेर गरेपछि वडाध्यक्ष सुवेदी नगर प्रहरी, टोल बिकास समिति र वडाका अन्य जनप्रतिनिधि र कर्मचारी लिएर शनिवार उक्त संरचना हटाउन गएका थिए ।
