बागलुङ/कालीगण्डकी करिडोरको कालाखोला र पोखरा बागलुङ राजमार्गको नयाँपुल जोड्ने मोटरेबल पुल बनाउने काम थालिएको छ । गण्डकी प्रदेशको पूर्वाधार विकास निर्देशनालयको ठेक्का सम्झौतामा यो काम थालिएको हो । निर्देशनालयले गत असारमा मुक्तिनाथ अमित संयुक्त निर्माण कम्पनीसँग १७ करोड रुपैयाँमा पुल बनाउने ठेक्का सम्झौता गरेको थियो ।

सोही ठेक्काको अधारमा ठेकेदार पक्षले नै यो स्थानमा माटो परीक्षण गरी डिजाइन समेत पेश गरेपछि निर्देशनालयले पुल बनाउन अनुमति दिने प्रावधानसहितको सम्झौतामा काम थालिएको हो । १ सय मीटर लामो र ११ मीटर चौडा यो पुल तीन वर्ष भित्रमा बनाइसक्नुपर्ने ठेकका सम्झौता रहेको निर्देशनालयका सब इन्जिनियर विजय सुवेदीले जानकारी दिए ।

यो पुलले कालीगण्डकी करिडोर र मध्यपहाडी लोकमार्गलाई नयाँपुलमा जोड्ने छ । गत वर्षातमा कालाखोलामा गएको भिषण पहिरोले करिडोर अबरुद्ध भएको र एक्लेसालमा वर्षेनी खस्ने पहिरोले दक्षिण बागलुङ र करिडोर हुँदै गुल्मी, पाल्पा र बुटवल जाने यात्रीले हैरानी खेपेका थिए । यो पुल बनेमा त्यो समस्या समाधान हुनेछ ।

हाल करिडोरको मालढुंगादेखि बलेवा खण्ड पनि कालोपत्रको तयारी छ । तर, एक्लेसालदेखि कालाखोला सम्मको खण्ड जोखिमको छ । वर्षातमा जहिले पनि अवरुद्ध बन्न सक्ने खतरा भएपछि यो पुलको व्यवस्थापन गरिएको हो । जिल्लाका जनप्रतिनिधिले गण्डकी प्रदेश सरकारको ध्यानाकर्षण गरेपछि मुख्यमन्त्री सुरेन्द्रराज पाण्डेले गतवर्ष यो पुलकालागि सहमति दिएका थिए । चालु वर्षको बजेटमै यो व्यवस्थापन भएपछि असारमै ठेक्का लगाइएको हो ।

अहिले ठेकेदार पक्षले कालीगण्डकी किनारको दुवै तर्फबाट २० मिटर तलको माटो निकालेर परीक्षणकालागि प्रयोगशालामा पठाएको छ । प्रतिवेदन आएपछि उक्त स्थानमा पुलको काम थालिने सुवेदीले जानकारी दिए । ठेकेदार पक्षले नै डिजाइन बनाएर निर्माण गर्ने यो नौलो र पहिलोपटकको अभ्याससमेत हो । यो कामले ठेकेदारले समयमा काम सक्ने पद्धति समेत विकास हुने विश्वास लिइएको छ ।