पोखरा/  यही भदौ १० गते भोटेकोशी नदीमा आएको बाढीमा परी मृत्यु भएका तर तत्काल शवको सनाखत हुन नसकेका कारण थप ५ शवको आज पोखरामा व्यवस्थापन गरिएको छ ।

यसअघि ७६ शवको व्यवस्थापन गरिएकै स्थान पोखरा–१६ उपल्लो दीप शिशौघारीस्थित सिंचाईको सरकारी जग्गामा ती शव व्यवस्थापन गरिएको हो । प्रहरी निरीक्षक टेकप्रसाद सुवेदीका अनुसार पोखरा स्थास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा होल्डमा रहेका २ महिला, २ पुरुष र १ बालको शव व्यवस्थापन गरिएको हो । शवमध्ये धादिङबाट १ र नवलपुरबाट ४ वटा पोखरा ल्याइएको थियो ।

कास्की प्रहरीका अनुसार हालसम्म कास्कीमा १०२ शव आएकोमा २१ वटा शव पहिचान अर्थात् सनाखत भई आफन्तले बुझेर लगिसकेका छन् । नवलपुर, गोरखा, तनहुँ, धादिङ जिल्लाबाट ती शवहरु पोखरा ल्याइएको थियो ।