काठमाडौं, १९ माघ -प्रधानमन्त्री निवास बालुवाटारमा नेकपा अध्यक्षद्वय केपी शर्मा ओली र पुष्पकमल दाहाल ‘प्रचण्ड’ छलफलमा जुटेका छन्। केही समय दुई अध्यक्षबीच छलफलपछि सचिवालयको बैठक बस्ने तयारी रहेको प्रधानमन्त्रीका प्रेस सल्लाहकार सूर्य थापाले जानकारी दिए।गत बुधबारदेखि चलिरहेको केन्द्रीय समिति बैठक जारी छ । शनिबारसम्म सदस्यहरुले बोल्ने क्रम सकिएको छ। आइतबार महासचिव विष्णु पौडेल र अध्यक्ष प्रचण्डले बैठकमा उठेका सवालको जवाफ दिने कार्यक्रम छ। यसै विषयमा दुई अध्यक्षबीच छलफल गर्ने र त्यसपछि सचिवालय बैठक बस्न लागेको प्रवक्ता नारायणकाजी श्रेष्ठले जानकारी दिए।
महासचिव विष्णु पौडेल र प्रचण्डबीच आइतबार बिहानै प्रचण्ड निवास खुमलटारमा भेटघाट भएको थियो । केन्द्रीय समिति बैठकमा सचिवालय सदस्यले बोल्ने की नबोल्ने भन्नेबारे पनि यसै सचिवालय बैठकले टुंगो लगाउने प्रवक्ता श्रेष्ठले बताए। दुई अध्यक्षबीचको छलफल र त्यसपछि सचिवालय बैठक बसी एउटा निचोडमा पुगेर केन्द्रीय समिति बैठकमा अध्यक्ष र महासचिव प्रस्तुत हुने तयारीमा छन् । जारी केन्द्रीय समिति बैठक आइतबार १ बजेका लागि बोलाइएको छ।
केन्द्रीय समिति बैठक उद्घाटनमा उपस्थित भएका ओली स्वास्थ्य समस्याका कारण त्यसपछिका बैठकमा उपस्थित छैनन् । अध्यक्षका तर्फबाट प्रचण्डले नै बैठकमा जवाफ दिने कार्यक्रम रहेका भएपनि आइतबारको बैठकमा प्रधानमन्त्री ओली पनि जाने तयारीमा रहेको प्रेस सल्लाहकार सूर्य थापाले जानकारी दिए। अध्यक्ष र महासचिवले जवाफ दिएपछि आजै केन्द्रीय समिति बैठक सकाउने तयारी छ।
