बागलुङ, २५ बैशाख– बागलुङमा रहेको अर्जुनवाण गण घोडाबाँधे व्यारेकले प्रशिक्षार्थीको अभ्यासका क्रममा बम हराएको भन्दै व्यारेक वरपरको सामुदायीक वन क्षेत्रमा प्रबेश नगर्न सर्वसाधारणलाई आग्रह गरेको छ । जिल्लाको काठेखोला गाउँपालिका–५ बिहुँमा रहेको व्यारेकमा गत चैत १८ गते प्रशिक्षार्थीहरुलाई मोर्टर फाईरिङको अभ्यास गराउँदा २ इन्चको एच.ई बम मिस फायर भएर सामुदायीक वनमा हराएको भन्दै नभेटिने बेलासम्म उक्त क्षेत्रमा प्रबेश नगर्न गणले आग्रह गरेको हो ।
काठेखोला गाउँपालिका तथा वडा कार्यालयको नममा पत्राचार गर्दै गणले हराएको बम खोज्ने काम भैरहेपनि अहिलेसम्म नभेटिएकाले सावधानी अपनाउन भनेको छ । अभ्यासका क्रममा मिस फायर भएर जंगलमा पुगेको बम नपड्किएकोले जोखिम हुनसक्ने गणले सचेत गराएको छ । गणका सेनानी दिप श्रेष्ठले गाउँपालिका तथा वडा कार्यालयलाई पत्राचार गर्दै उक्त बमको दैनिक खोजी भैरहेको र नभेटिएसम्म वनक्षेत्रमा कसैलाई प्रबेश नदिन आग्रह गरेका छन् ।
काठेखोला र गल्कोट नगरपालिकाको सिमानामा पर्ने घोडाबाँधे व्यारेक आसपास ठुलो वनक्षेत्र रहेको वडा कार्यालयले जनाएको छ । बिहुँका स्थानीयले घाँसदाउरा गर्ने वनमा बम हराएको हो । गणको पत्रपछि गाउँपालिकाले सर्वसाधारणलाई साबधानी अपनाउन आग्रह गरेको छ । सामाजिक सञ्चाल र मौखिक सूचना प्रवाह गर्दै उक्त ठाउँमा प्रबेश नगर्न सर्वसाधारणलाई आग्रह गरिएको गाउँपालिकाका प्रमुख प्रशासकीय अधिकृत खिम बहादुर बिकले बताए ।
उता, गणले भने बम हराएको बिषय खासै ठुलो नभएको तर सावधानीका लागि सर्वसाधारणमा सूचना पु¥याउन प्रयास गरेको बताएको छ । गणपति मिलनध्वज मल्लले व्यारेक परिसरमै बम हराएकाले सर्वसाधारणको लागि त्रासको बिषय नभएको बताए । आसपासका क्षेत्रमा सावधानीका लागि मात्रै आँफुहरुले जानकारी गराएको उनको भनाई थियो ।