बेनी, २१ बैशाख– नेपालीमा एउटा उक्ति छ, ‘माल पाएर चाल नपाएको !’ म्याग्दी सदरमुकाम बेनीस्थित खुल्लामञ्चमा रहेको शैक्षिक तालिम केन्द्रको भवनमा रहेको एउटा कोठाभित्रको दृष्यले उक्त भनाइको चरितार्थ गर्छ ।
गतवर्ष कोरोना संक्रमण फैलिएसँगै जिल्लाका सबै स्थानीय तह, बेनी अस्पतालको लगानीमा स्थापना भएको संक्रमितलाई राख्ने आइसोलेसन कक्षका लागि खरिद गरिएका आवश्यक उपकरणहरू अलपत्र अवस्थामा छन् । १० वटा बेड बेनी नगरपालिकाले, ५ बेड स्थानीय तह, बाँकी विपद् व्यवस्थापन र बेनी अस्पतालले खर्चमाबाट स्थापना गरिएको थियो । दोस्रो लहरसँगै म्याग्दीमा ७० जना सक्रिय संक्रमित पुग्दासमेत बिरामीको उपचारका लागि जनशक्ति र पूर्वाधार अझै व्यवस्थापन हुन सकेको छैन ।
२० बेडको आइसोलेसनको भवन अहिले लथालिङ छ । आइसोलेसन कक्ष सञ्चालन गरिएको शैक्षिक तालिम केन्द्रको भवनमा कार्यालय सञ्चालन भएपछि बेनी अस्पतालमा बनाउन लागिएको कक्षको तयारी अझै पूरा भएको छैन । संक्रमितको संख्या दिनप्रति दिन ह्वात्तै बढ्दासमेत संस्थागत आइसोलेसनमा बस्न चाहने संक्रमितलाई राख्न माउन्ट एभरेस्ट आवासीय माविको हिलसाइटको भवन प्रयोग गरिएको छ ।
कोठामा परिवारसँगै बसेका संक्रमितलाई आवश्यक पर्ने आइसोलेसन कक्षको तयारी नहुँदा संक्रमित अलमलमा पर्ने गरेका छन् । अक्सिजन सिलिन्डर, बिरामी सुत्ने आरामदायी ओछ्यान, औषधी राख्ने ठाउँ लगायत कोरोना संक्रमितको उपचारमा आवश्यक पर्ने हुने उपकरणहरु प्रयोगविहीन भएका हुन् । स्वास्थ्य कार्यालय म्याग्दीका निमित्त प्रमुख एकनारायण लम्सालले बेनी अस्पतालको निर्माणाधिन भवनमा स्थापना गर्न लागिएको आइसोलेसनमा ती सामग्री प्रयोग हुने बताए ।
बेनी अस्पतालमा सञ्चालन गरिएको ६ बेड क्षमताको आइसियू कक्षसमेत जनशक्ति अभावका कारण सञ्चालनमा आउन सकेको छैन । बेनी अस्पतालको नयाँ भवनमा आइसोलेसन कक्ष बनाउन लागिएको छ । बेनी नगरपालिकाले माउन्ट एभरेस्टको भवनमा ४ बेडको तयारी भएको छ भने २० बेडसम्मको तयारी भइरहेको नगर स्वास्थ्य संयोजक लिला गौतमले बताइन् । ‘थप आवश्यक परेपनि विस्तार गछौं । होम आइसोलेसनमा बस्न नसक्नेहरुलाई त्यहाँ राखिन्छ,’ गौतमले भनिन् । कोरोना संक्रमित र जटिल अवस्थाका बिरामी लक्ष्य गरी अस्पतालमै स्थापना गरिएको ६ बेड क्षमताको आइसोलेसन वार्डसमेत नियमित सञ्चालनमा छैन ।
आइसोलेसनका लागि आवश्यक पर्ने जनशक्ति अभाव हुँदा अहिले अस्पतालले ३ बेडको प्रिआइसोलेसन वार्ड छ । जिल्लाका अन्य ५ वटै गाउँपालिकाले अक्सिजन सेवासहित ५÷५ बेड क्षमताको कोरोना अस्पताल सञ्चालन गरेका छन् । ती अस्पतालमा अक्सिजनको उपलब्धता गराइएको भए पनि भेन्टिलेटरसहितको उपचार गर्न पूर्वाधार र जनशक्ति व्यवस्थापन भने हुन सकेको छैन । हरेक वर्ष लाखौंको सामाग्री खरिद गर्ने तर निरन्तर प्रयोगमा चासो नदेखाउदाँ अनावश्यक रुपमा लाखौं खर्च भएको छ ।