तनहुँ – जिल्लाको सदरमुकाम दमौलीस्थित एक हार्डवेयर पसलमा लागेको आगो करिब नियन्त्रणमा आएको छ । बिहान १० बजेदेखि लागेको आगो निभाउन हेलिकप्टरबाट पानी खन्याइएको थियो ।
स्थानीय स्तरबाट आगो निभाउन नसकेपछि गृह मन्त्रालयले सिम्रिक एयरसँग सहयोग मागेको थियो । सिम्रिक एयरको हेलिकप्टर पानी लिएर काठमाडौंबाट दमौली आएर पानी खन्यापछि आगलागी नियन्त्रणमा आएको हो ।
आगो निभाउन व्यास नगरपालिकाको दमकल, मुग्लिङ-पोखरा सडक आयोजनाको ट्याङ्करसँगै निजी ट्याङ्कर पनि प्रयोग गरिएको थियो ।
दमौलीको भुपाल हार्डवेयरमा आगलागी भएको हो । आगलागीबाट भएको क्षतिको विवरण आएको छैन । हार्डवेयर पसलसँगै आसपासका चारवटा घरमा पनि क्षति पुगेको छ । विद्युत् लाइन सर्ट भएर आगो लागेको अनुमान गरिएको छ ।
