बागलुङ/ पाँच वर्षअघिसम्म सवारी साधन भेट्न पाँच घण्टा लामो यात्रा गरेर खर्वाङ पुग्ने समीर पुन अहिले आफ्नै दौलोबाट सवारी चढ्छन् । बागलुङको वडिगाड गाउँपालिका ३, सिसाखानीका स्थानीय पुनले घर छेवैमा पुगेको सडकमा गुडेका सवारी देख्न थालेको धेरै भएको छैन् ।

सिसाखानीमा पुगेको सडकले समिर र उनका गाउँलेहरुलाई निकै सघाएको छ । सिसाखानीका सबै टोलमा अहिले सडकको पहुँच छ । कच्ची सडकको पहुँच गाउँसम्म पुगेपछि गाउँलेहरु खुशी छन् । मानिसहरु ओहोरदोहोरका लागि मात्रै होइन यहाँका सर्वसाधारणले खाद्यान्न लगायतका सामग्री गाउँ पु¥याउन निकै लामो समय सास्ती खेपे ।

घोडा, खच्चड र भरियाको भरमा गाउँमा खाद्यान्न तथा उपभोग्य समान पु¥याउने यहाँका सर्वसाधारण अहिले आफ्नै घरदैलोमा पिकअप भ्यान र ट्याक्टरबाट सामान झार्छन् । ‘मुल्य सस्तो, समयको बचत, सडक आएपछि त निकै सजिलो भएको छ,’ पुनले भने, ‘यति छिट्टै सडक आउला भनेर सोचिएकै थिएन ।’

वडिगाड गाउँपालिका साविकका ७ वटा गाउँ विकास समितिलाई जोडेर बनेको हो । साविक जिल्ला विकास समिति र गाविस हुने बेला कठिन भुगोल रहेको बडिगाड ओझेलमा परेको थियो । स्थानीय तह गठबनपछि गाउँपालिकाको नजर पुगेको सिसाखानीमा सडक सञ्चालको विकास निकै छोटो समयमा भएको स्थानीयको बुझाइ छ ।

वडिगाडका सिसाखानीसहित रणसिंहकिटेनी, दर्लिङ लगायतका साविकका गाविसमा अहिले सडक सञ्जालले सहज बनाएको छ । सडकको सहज पहुँचपछि मात्र अन्य विकासका गतिविधि संचालनमा सहजता हुने भएकाले पालिकाको दशवटै वडा केन्द्रसंगै पालिका र केन्द्रसंगको सडक संजाल जोडिएको गाउँपालिका अध्यक्ष मेहरसिंह पाईजाले बताए ।

वडिगाडले पाँच वर्षमा १२ वटा झलुंगेपुल निर्माण गरेको छ । खोलानाला धेरै रहेको गाउँपालिकामा ४ वटा झोलुंगेपुल त अझै निर्माणाधिन अवस्थामा रहेका छन् । ‘पहिलेको विकट गाविस हाम्रो अहिले मुहार फेरेको छ’ स्थानीय समिर पुनले भने ‘यातायात, स्वास्थ र अन्य पूर्वाधारका क्षेत्रमा पनि सहज भएको महशुस गरेका छौं ।’

गाउँपालिकाले झन्डै ६ करोड लागतमा निमार्णको अन्तिम चरणमा रहेको सुविधा सम्पन्न पालिकाको प्रशासकिय भवनदेखि १८ करोडको लागतमा प्राथमिक आधारभूत अस्पताल बडिगाडमा निमार्णको चरणमा छ ।
गाउँपालिकाले ७ वटा वडा कार्यालय भवन, ५ वटा सामुदायिक स्वास्थ्य इकाई स्थापना गरेको अध्यक्ष पाइजाले बताए । ‘हामीले ठूला योजना र आधारभुत तहका जनताको आवश्यकतालाई समान हिसाबले अघि बढायौं,’ पाईजाले भने, ‘दीगो विकासको आधार तयार भएका छन् ।’ खानेपानीको चरम समस्या रहेको वडिगाडका वडाहरुमा चार हजार बढी धारा निर्माण भएका छन् । अहिलेकै अवस्थामा काम भए बिभिन्न सरकारी तथा गैह्र सरकारी संस्थासँगको सहकार्यमा २०८० सम्ममा सबैका घरमा धारा पुग्ने अध्यक्ष पाईजा बताउँछन् ।

‘विकासले हाम्रो उठिबास लगायो, तर गाउँपालिकाको साथले हामीले बास पाएका छौं’ वडिगाड गाउँपालिका–९ की बाटुली बिकले भनिन् ‘सडक निर्माण गर्दा जोखिममा परेको हाम्रो गाउँ र घर अर्को ठाउँमा सरेको छ, अहिले ढुक्क छ ।’ गाउँमा सकड, खानेपानी, स्वासथ्य संस्था पुगेपछि सर्वसाधारणमा खुसी छाएको छ ।

‘गाउँपालिकाले पाँच वर्षमा मुहार फेरेको महशुस मैले गरेको छु,’ अध्यक्ष पाइजा भने, ‘तर काम भए भएनन्, जनताले के कति सुविधा पाएका छन् भनेर उनीहरुले नै भन्ने कुरा हो,’