पोखरा/ पूर्णविक्रम शाह ‘पल’ को उच्च अदालत पोखरामा बिहीबार हुने भनिएको सुनुवाइ स्थगित भएको छ । जबर्जस्ती करणी आरोपमा पक्राउ परेका शाह र उनका सहयोगी भनिएका कृष्ण जोशीको मुद्दा बिहीबार सुनुवाइ गर्ने कार्यतालिका थियो ।
अब पेशी अर्को बिहीबारका लागि तोकिएको उच्च अदालत पोखराका रजिस्टार श्रीलाल पौडेलले जानकारी दिए । ‘आज सुनुवाइ स्थगित भएको छ । उहाँ (पल शाह)कै वकिलहरुले सुनुवाइ हटाउनुभयो’, उनले भने, ‘अब अर्को पेशी अर्को बिहीबार हुन्छ ।’ उक्त मुद्दा न्यायधीशद्वय डिल्लीराम आचार्य र ऋषि राजभण्डारीको संयुक्त इजलाशमा थियो ।
नाबालिग बलात्कार आरोपमा पल शाह तनहुँ र गैंडाकोट अदालतबाट पुर्पक्षका लागि कारागार चलान भएका थिए । उक्त आदेशविरुद्ध पल उच्च अदालत पोखरामा निवेदन दिएका थिए । यता, धरौटीमा छोड्न दिइएको आदेशविरुद्ध पनि सरकारी वकिल उच्च अदालत पोखरामा निवेदन दिएका थिए । ती सबै निवदेन उपर उच्च अदालत पोखराले २२ वैशाखमा कृष्ण जोशीलाई छोड्ने आदेश माग गरेको थियो ।
