बागलुङ/डेमोक्रेटिक लयर्स एसोसिएसनको धौलागिरी समितिको बैठकले आसन्न केन्द्रीय महाधिवेसनमा अधिवक्ता भूमिश्वर गौतमलाई केन्द्रीय उपाध्यक्षमा उमेदवार बनाउने निर्णय गरेको छ । गौतमले राखेको उमेदवारीको एजेण्डालाई बैठकले सर्बसम्मत रुपमा पास गरेको हो ।
बागलुङ, पर्वत र म्याग्दीमा क्रियाशिल डिएएका पदाधिकारी र सदस्यको भेलाले यो पटक उपाध्यक्ष धौलागिरि क्षेत्रले पाउनुपर्ने दावी समेत गरेका थिए । हरेक महाधिवेसनहरुमा उपेक्षामा परेकोले यो पटक तीनवटै जिल्लाका अधिवक्ताहरु एकजुट भएर निर्वाचनमा होमिने समेत बताएका छन् । तीन जिल्लाबाट ३५ जना पार्सदले महाधिवेसनमा भाग लिनेछन् । गौतमसँगै दावेदारी गरेका म्याग्दीका चिरिन्जवी शर्माले गौतमलाई समर्थत गरेर धौलागिरिबाट एकमात्र उमेदवारको रुपमा उठाउने निर्णय भएको हो । फागुन ६ र ७ गते हेटौडामा डिएलएको महाधिवेसन हुँदैछ ।
त्यस्तै बैठकले डिएलएको नियमित बैठक तथा भेला गर्ने, अधिवक्ताहरुको पेशागत हितको क्षेत्रमा काम गर्ने, आबाज उठाउने तथा राष्ट्रिय राजनीतिमा आफ्नो धारणा बनाउने निर्णय समेत गरेको अध्यक्ष निरन्जन लाल राजभण्डारीले बताए । बैठकले समितिका सचिव विश्वप्रकाश प्रसाईकी धर्मपत्नि बिरामी भइ शल्यक्रिया समेत गरेर बसेकोले शिघ्र स्वास्थ्यलाभको कामना पनि गरेको छ ।
भेलामा सहभािग भएका अधिवक्ताहरुले पेशागत क्षमता बढाउन नेतृत्वले पहल गर्नुपर्ने भन्दै कानून व्यवसायको क्षेत्रमा घट्दो आर्कषणलाई बढाएर लैजानुपर्ने धारणा राखेका थिए । पेशागत क्षेत्रमा अधिवक्ताहरु आउन छाड्दा न्यायको क्षेत्र पनि कमजोर हुने भन्दै उनीहरुले लाइसेन्स लिएको हरेक व्यक्तिलाई सशक्त बनाउन बार एसोसिएसनलाई समेत जिम्मेवार बनाउनुपर्ने धारणा राखेका थिए । कार्यक्रममा अधिवक्ता भूमिश्वर गौतम, चिरन्जिवि शर्मा, सागर जिवी उपाध्याय, बद्रीप्रसाद शर्मा, डिल्लीराज पौडेल, हरिप्रसाद गौतम, लगायतले धारणा समेत राखेका थिए ।
