बागलुङ/ गलकोट नगरपालिका–५ टेउवामा तीन बर्षअघि आयोजित अन्तराष्ट्रिय मूर्तिकला कार्यशालाको आयव्यय बिबरण सार्वजनिक गरिएको छ । गलकोट कला प्रतिष्ठानले मूर्तिकला कार्यशालाको आयव्यय बिबरण सार्वजनिक गरेको हो ।
२०७६ फागुन ५ देखि २१ गतेसम्म चलेको कार्यशालामा प्रतिष्ठानलाई ८ हजारभन्दा बढी ऋण लागेको छ । प्रतिष्ठानले एक करोड ३० लाख ३१ हजार ६ सय ३१ रुपैयाँ आम्दानी गर्दा एक करोड ३० लाख ३९ हजार ६ सय ५६ रुपैयाँ खर्च भएको गलकोट कला प्रतिष्ठानका अध्यक्ष क्या. पुर्णबहादुर रानाले जानकारी दिए ।
कार्यशालाका लागि गण्डकी प्रदेश, संघ सरकार, गलकोट नगरपालिका र बिभिन्न संघसंस्था तथा व्यक्तिहरुले आर्थिक सहयोग गरेका थिए । जग्गाको व्यवस्थापनदेखि कार्याशालामा बिभिन्न देशका मुर्तिकार ल्याउँदासम्मको खर्च बिबरण सार्वजनिक गरिएको हो ।
प्रतिष्ठानले टेउवामा मूर्तिकला कार्यशालाको सम्भाव्यता अध्ययन गरी जग्गा र आर्थिक व्यवस्थापन गरेर मूर्तिकला कार्यशाला गरेको थियो । गलकोटलाई पर्यटकीय हबको रुपमा विकास गर्न मूर्तिकलाको संरक्षण र संवद्र्धन गर्न प्रतिष्ठानले गृहकार्य गरिरहेको छ ।
कार्यशाला व्यवस्थापनको लागि स्थानीयले ११ रोपनी जग्गा उपलब्ध गराएका थिए । कार्यशाला निर्माणको लागि संघले ५० लाख र गण्डकी प्रदेश सरकारले ४० लाख गरी ९० लाख बजेट विनियोजन गरेको थियो । मुर्तिकला कार्यशाला निर्माण गर्नको लागि करिब तीन करोड खर्च लाग्ने अनुमान गरिएको थियो ।
दश जना बिदेशी र पाँच जना नेपाली ख्याती प्राप्त मुर्तिकारहरुले कार्याशालामा मुर्ति तयार गरेका थिए । कार्याशालामा निर्माण भएका मुर्तिहरु अहिले आन्तरिक पर्यटको आकर्षणका केन्द्र भएका छन् । ‘प्राकृतिक रुपमा सुन्दर र मनमोहक टेउवालाई मूर्तिकलाले थप सुन्दरता प्रदान गरेको छ’ गलकोट नगरपालिकाका उपप्रमुख फमलाल न्युरेले भने, ‘गलकोटमा पर्यटन प्रवद्र्धन गर्न अन्तराष्ट्रिय मूर्तिकलाले उल्लेख्य भूमिका खेल्नेमा हामी विश्वस्त छौं ।’
