बागलुङ/ बागलुङ नगरपालिकाले हरेक दिन बिहान कार्यालयमा राष्ट्रिय धुन बजाएपछि मात्रै काम थाल्ने भएको छ । हरेक दिन बिहान १० बजे राष्ट्रिय धुन बजाउने र काम थाल्ने व्यवस्था आइतबारदेखि शुरु भएको हो ।
‘खेलका बिश्वकपदेखि अन्तराष्ट्रिय सम्मेलनमा पनि राष्ट्रिय धुन बनाएर काम थालिन्छ भने हामीले किन नगर्ने’ नगरप्रमुख बसन्तकुमार श्रेष्ठले भने, ‘राष्ट्रिय धुनले हरेक जनप्रतिनिधि र कर्मचारीमा उर्जा प्रदान गर्छ ।’ राष्ट्रियता र जनताको पक्षमा काम गर्नुपर्छ भन्ने भावना विकास गर्न यो कामको थालनी गरेको उनले बताए ।
आइतबार आयोजित एक कार्यक्रममा धुन बनाएर कामको थालनी भएको जानकारी नगरप्रमुख श्रेष्ठले गराएका थिए । उक्त अबसरमा उपप्रमुख राजु खड्काले काम गर्ने जोश र जाँगर भर्न राष्ट्रिय गीत बजाउने चलन उपयोगी बन्ने बताए । उनले इमान्दारिता र राष्ट्रलाई साथमा राखेर काम गर्ने अबसर दिने बताए ।
कार्यक्रममा प्रमुख प्रशासकीय अधिकृत पुरुषोत्तम सापकोटाले केही समयअघि नै यो बिषयको परिकल्पना भएपनि ढिलागरी प्रयोगमा ल्याइएको बताए । उनले हरेक कर्मचारीले मुस्कान सहितको सेवा दिनुपर्ने धारणा राखे । ‘काम नभएर रिसाएका सेवाग्राहीलाई कामसँगै मुस्कानले खुसी पार्नुपर्छ’ सापकोटाले भने, ‘सबैको भलो चाहेर काम गरे आँफूलाई पनि भलो हुनेछ ।’ राज्यको सेवा सुविधाबाट कोही बञ्चित हुने काम गर्न नहुने र राष्ट्रिय धुनले दिनभर काम गर्ने उर्जा र राष्ट्रियताको भावना विकास हुने धारणा राखे ।
